नेपाली कांग्रेसका सांसद खडकबहादुर बुढाले छेडा–चाँदे सडकअन्तर्गतको सडक अवरोध तत्काल समाधान गर्न सरकारको ध्यानाकर्षण गराएका छन् । मंगलबार प्रतिनिधिसभाको आकस्मिक समयमा बोल्दै सांसद बुढाले लोडनी क्षेत्रमा सडक अवरुद्ध हुँदा स्थानीय नागरिकले बर्सेनि सास्ती खेप्नुपरेको भन्दै सरकारको गम्भीर ध्यानाकर्षण गराएका हुन् । बुढाले जाजरकोटसहित डोल्पा र रुकुम पश्चिमका हजारौँ नागरिकको दैनिकीसँग प्रत्यक्ष जोडिएका सडक, पुल तथा स्वास्थ्य सेवाका बिषयमा समेत सरकारको ध्यानाकर्षण गराएका छन् ।
वर्षायाम सुरु भएसँगै भेरी करिडोरअन्तर्गतका विभिन्न खोलामा पुल नहुँदा नागरिकको आवागमन प्रभावित भएको बताए। उनले पासागाड, तात्रगाड र मैदेलगायतका खोलामा पुल निर्माण सम्पन्न हुन नसक्दा वर्षायाममा यातायात सेवा लगभग अवरुद्ध हुने अवस्था रहेको उल्लेख गरे ।
उनका अनुसार सडक तथा पुलको कमजोर अवस्थाका कारण जाजरकोट, डोल्पा र रुकुम पश्चिमका नागरिक प्रत्यक्ष रूपमा प्रभावित भएका छन् । बिरामीले समयमै उपचार पाउन नसक्ने, विद्यार्थीको आवागमन प्रभावित हुने तथा खाद्यान्न,औषधि र अन्य अत्यावश्यक सामग्रीको ढुवानीमा समेत समस्या हुने अवस्था रहेको उनले संसदमा बताए ।
सांसद बुढाले भेरी करिडोरजस्तो रणनीतिक र महत्त्वपूर्ण सडक खण्डमा रहेका पुल निर्माणलाई सरकारले उच्च प्राथमिकतामा राखेर शीघ्र सम्पन्न गर्नुपर्ने माग गरे । त्यस्तै, छेडागाड–जुनीचाँदे सडकअन्तर्गत लोडनी क्षेत्रमा सडक अवरुद्ध हुँदा स्थानीय बासिन्दा थप समस्यामा परेको उनले बताए । वर्षायाममा हरेक वर्ष सडक अवरुद्ध हुने र नागरिकले सास्ती खेप्नुपर्ने अवस्था अन्त्य गर्न दीर्घकालीन समाधान खोज्नुपर्नेमा उनले जोड दिए ।
‘बर्सेनि दोहोरिने यस्ता समस्याको दीर्घकालीन समाधान गर्न सरकार किन गम्भीर देखिँदैन ?’ भन्ने प्रश्न गर्दै बुढाले अवरुद्ध सडक तत्काल सञ्चालनमा ल्याउन सरकारसँग माग गरे । सोमबार राति मात्र भेरी नगरपालिका– ४ बोहरामा गएको पहिरोका कारण एउटा घर पूर्ण रूपमा भत्किएको र परिवार विस्थापित हुन बाध्य भएको विषय पनि सांसद बुढाले संसदमा उठाए ।
उनले पहिरो प्रभावित परिवारको तत्काल उद्धार गरी सुरक्षित आवासको व्यवस्था गर्न तथा उचित राहत र क्षतिपूर्तिको व्यवस्था गर्न सरकारसँग माग गरे । प्राकृतिक विपतका कारण प्रभावित नागरिकलाई तत्काल राहत उपलब्ध गराउनुका साथै पुनर्स्थापनाको कामलाई प्रभावकारी रूपमा अघि बढाउनुपर्ने बताए ।
त्यसैगरी, उनले जाजरकोट अस्पतालमा विशेषज्ञ चिकित्सकको अभाव रहेको विषयलाई समेत प्रतिनिधिसभामा उठाए । ५० शय्यामा स्तरोन्नति भएको जाजरकोट अस्पताल विशेषज्ञ चिकित्सकविहीन हुँदा जिल्लावासीले गुणस्तरीय स्वास्थ्य सेवा पाउन कठिनाइ भइरहेको भन्दै उनले नेपाल सरकार र स्वास्थ्य तथा जनसंख्या मन्त्रालयको गम्भीर ध्यानाकर्षण गराए ।
विशेषगरी बालरोग, स्त्रीरोग तथा हाडजोर्नीलगायतका विशेषज्ञ चिकित्सकको व्यवस्था जाजरकोट अस्पतालमा तत्काल गर्नुपर्ने उनको माग छ । अस्पतालको भौतिक क्षमता विस्तार भए पनि आवश्यक जनशक्ति र विशेषज्ञ सेवा उपलब्ध हुन नसक्दा जिल्लाका नागरिक उपचारका लागि बाहिरी जिल्ला जानुपर्ने बाध्यता रहेको उनले बताए ।
सांसद बुढाले भेरी करिडोरका पुल निर्माणलाई प्राथमिकताका साथ सम्पन्न गर्ने, अवरुद्ध सडक तत्काल सञ्चालनमा ल्याउने, विपतपीडित नागरिकलाई राहत तथा पुनर्स्थापना गर्ने र जाजरकोट अस्पतालमा आवश्यक विशेषज्ञ चिकित्सकको व्यवस्था गर्ने काममा सरकार गम्भीर बन्नुपर्ने बताए ।
