प्रमुख प्रतिपक्षी नेपाली कांग्रेसले सुनसरीको देवानगन्ज गाउँपालिका– ३, कप्तानगन्जमा भएको घटनाको सम्पूर्ण जिम्मेवारी सरकारले लिनुपर्ने बताएको छ।
बिहीबार बसेको प्रतिनिधिसभा बैठकको सुरुमै कांग्रेसकी प्रमुख सचेतक बासना थापाले घटनाको निष्पक्ष र विश्वसनीय छानबिन गर्न सरकारसँग माग गरिन्। उनले नागरिकको ज्यान जाने गरी गोली चलाउनुपर्ने अवस्था किन सिर्जना भयो भन्ने प्रश्न गर्दै घटनाको जवाफदेही सरकार हुनुपर्ने बताइन्।
प्रमुख सचेतक थापाले घटनापछि प्रधानमन्त्री र गृहमन्त्री मौन बसेको भन्दै आलोचना गरिन्। उनले राज्यले नागरिकको सुरक्षा सुनिश्चित गर्नुपर्ने र दोषी पहिचान गरी कारबाही गर्नुपर्ने धारणा राखिन्।
उनले कसैको उक्साहट, अफवाह वा घृणाको राजनीतिले सामाजिक सदभाव खलबल्याउन नसक्ने बताउँदै सबै नेपालीलाई सहिष्णुता, शान्ति र एकताको पक्षमा उभिन आह्वान गरिन्।
See More On
