दुई समुदायबिचको झडपपछि प्रहरीले चलाएको गोली लागेर एकजनाको मृत्यु भएपछि सुनसरीको देवानगन्ज गाउँपालिकाले दुई दिन शोकबिदा दिएको छ ।
सुनसरीको देवानगन्ज गाउँपालिका– ३ स्थित कप्तानगन्ज बजारमा आइतबार राति दुई समुदायबिच भएको हिंसात्मक झडप नियन्त्रणमा लिन प्रहरीले चलाएको गोलीबाट एकजनाको मृत्यु भएको थियो भने प्रहरीसहित २२ जना घाइते भएका थिए । सोही घटनाप्रति दुःख व्यक्त गर्दै गाउँपालिकाले सोमबार र मंगलबार दुई दिन शोकबिदा दिने निर्णय गरेको हो ।
गाउँपालिका अध्यक्ष बेचनप्रसाद मेहताले १० साउन राति कप्तानगन्ज बजारमा भएको झडपका क्रममा मृत्यु भएका व्यक्तिप्रति गहिरो समवेदना व्यक्त गर्दै साउन ११ र १२ गते गाउँपालिकाअन्तर्गतका सबै वडा कार्यालय, शैक्षिक संस्था तथा स्वास्थ्य संस्थाबाहेकका अन्य आवश्यक कार्यालयमा शोकबिदा दिने निर्णय गरिएको जानकारी दिएका छन् ।
अध्यक्ष मेहताका अनुसार गाउँपालिकाले दिवंगतप्रति श्रद्धाञ्जली व्यक्त गर्दै घाइतेहरूको शीघ्र स्वास्थ्यलाभको कामना गरेको छ । साथै, शोकबिदाका कारण सेवाग्राहीमा पर्न जाने असुविधाप्रति गाउँपालिकाले क्षमायाचना गरेको छ ।
आइतबार राति बोलबम यात्रामा जाने तयारीका क्रममा डिजे बाजा बजाएर नाचगान गरेको विषयमा स्थानीय दुई समुदायबिच भएको विवाद हिंसात्मक झडपमा परिणत भएपछि स्थिति नियन्त्रणमा लिन प्रहरीले गोली चलाएको थियो ।
घटनामा प्रहरीको गोली लागेर देवानगन्ज गाउँपालिका– ३, कप्तानगन्जका २४ वर्षीय ओमप्रकाश मेहताको उपचारका क्रममा राति नै मृत्यु भएको हो । उनको विराटनगरस्थित न्युरो अस्पतालमा उपचार भइरहेको थियो ।
घाइतेमध्ये स्थानीय २२ वर्षीय मिथलेश यादव, १८ वर्षीय अमलेश मेहता, २५ वर्षीय मिथलेश मेहता, २० वर्षीय अमितकुमार यादव, २१ वर्षीय रवीन्द्र मेहता, १८ वर्षीय अमितकुमार यादव, २५ वर्षीय सुनीलकुमार मेहता र २६ वर्षीय सुनीलकुमार मेहताको विराटनगरस्थित न्युरो अस्पताल, विराट नर्सिङ होम र कोशी अस्पतालमा उपचार भइरहेको छ ।
प्रहरीका अनुसार झडपमा प्रहरी निरीक्षक राकेश राईसहित आठजना सुरक्षाकर्मी घाइते भएका छन् । झडपमा घाइते हुनेको संख्या २२ पुगेको छ । घटनाका क्रममा भएको तोडफोड र आगजनीबाट भएको क्षतिको विवरण संकलन भइरहेको प्रहरीले जनाएको छ ।
घटनाको सूचना पाएलगत्तै राति नै घटनास्थल पुगेका र विराटनगरस्थित विभिन्न अस्पतालमा उपचाररत मृतक तथा घाइतेहरूको अवस्था बुझेका सुनसरी क्षेत्र नम्बर ३ का रास्वपा सांसद लालविक्रम थापाले प्रहरीले हतारमा अन्धाधुन्ध गोली चलाउँदा स्थानीय एक युवाको ज्यान गएको र केही घाइतेको अवस्था गम्भीर रहेको बताएका छन् । उनले सुरक्षा नेतृत्वलाई तत्काल निलम्बन गरेर मात्र छानबिन प्रक्रिया अघि बढाउनुपर्ने बताएका छन् ।
आइतबार राति गोली चलेको घटनास्थल देवानगन्ज गाउँपालिका– ३, कप्तानगन्जको नयाँ बजार नेपाल–भारत सीमानाकाबाट करिब एक किलोमिटर उत्तरमा पर्छ ।
थप हिंसा भड्किन नदिन सुनसरी प्रशासनले हरिनगरा गाउँपालिकाको घुस्की, भुटाहा, कप्तानगन्ज तथा देवानगन्ज बजार क्षेत्रमा सोमबार बिहान ७ बजेदेखि अनिश्चितकालीन कर्फ्यु आदेश जारी गरेको छ ।
तर, आक्रोशित स्थानीयले कर्फ्यु उल्लंघन गर्दै पसलहरू तोडफोड गर्नुका साथै आगजनी गरेर प्रहरी प्रशासनविरुद्ध प्रदर्शन गरिरहेका छन् । सुनसरी प्रशासनले थप हिंसा हुन नदिन सुरक्षा व्यवस्था कडा बनाएको जनाएको छ ।
आक्रोशित प्रदर्शनकारीहरूले सुनसरीको दक्षिणी क्षेत्रमा पर्ने देवानगन्ज गाउँपालिकामा मात्र नभई सदरमुकाम इनरुवासहित अन्य विभिन्न बजार क्षेत्रमा समेत प्रदर्शन गरिरहेका छन् । स्थानीय प्रशासनले जारी गरेको कर्फ्यु आदेश उल्लंघन गर्दै प्रदर्शन र आगजनी भएपछि स्थिति नियन्त्रणमा लिन नेपाली सेना परिचालन गरिएको छ ।
