मुस्ताङमा हराएका दुई बालक दुई दिनपछि सकुशल फेला

मुस्ताङ जिल्लाको लोमान्थाङ गाउँपालिका–५ स्थित मोन्छयो ड्रग्कार थेग्छेन लिङ (गुम्बा) परिसरमा रहेको महाकरुणा शाक्यप निमाविको होस्टेलबाट हराएका दुई बालक दुई दिनपछि सकुशल फेला परेका छन्।

असार २५ गते साँझ ६:०० बजेदेखि कक्षा १ र यूकेजीमा अध्ययनरत दुई बालक होस्टेलबाट सम्पर्कविहीन भएका थिए। उनीहरू हराएपछि प्रहरी तथा स्थानीयवासीले व्यापक खोजतलास अभियान सञ्चालन गरेका थिए।

खोजतलासकै क्रममा असार २७ गते शनिबार बिहान १०:३० बजे लोमान्थाङ गाउँपालिका–२ स्थित भार्चा क्षेत्रमा दुवै बालक सकुशल फेला परेकाे प्रहरीले जनाएको छ ।

फेला परेपछि दुवै बालकको स्वास्थ्य परीक्षण गरिएको थियो। स्वास्थ्य अवस्था सामान्य रहेको पुष्टि भएपछि स्थानीय जनप्रतिनिधिको रोहबरमा उनीहरूलाई विद्यालयका प्रधानाध्यापकको जिम्मा लगाइएको प्रहरीले जनाएको छ।