सामाजिक सञ्जाल फेसबुक ह्याक गरी अनधिकृत पहुँच पुर्याएर ठगी गर्ने कार्यमा संलग्न १९ वर्षीय युवकलाई प्रहरीले पक्राउ गरेको छ। नेपाल प्रहरीको साइबर ब्युरोबाट खटिएको विशेष टोलीले नुवाकोटको लिखु गाउँपालिका– ४ स्थायी ठेगाना भई काठमाडौं महानगरपालिका– १६, बालाजु बस्ने विवेक सुनारलाई पक्राउ गरेको हो।
सुनारले पीडितको फेसबुक ह्याक गरी आफन्त र साथीभाइसँग रकम माग गर्दै ठगी गरेको ब्युरोले जनाएको छ। बुधबार पक्राउ परेका युवकमाथि विद्युतीय (इलेक्ट्रोनिक) कारोबार ऐन, २०६३ अन्तर्गतको कसुरमा काठमाडौं जिल्ला अदालतबाट पाँच दिन म्याद थप भएको छ।
