ग्लोबल आइएमई बैंक लिमिटेडको आयोजनामा आर्टिफिसिएल इन्टेलिजेन्स (एआई) तथा मेसिन लर्निङ (एमएल)सम्बन्धी नवप्रवर्तनलाई प्रोत्साहन गर्ने उद्देश्यले ग्लोबल आइएमई एआई–एमएल ह्याकाथन २०२६ शुक्रबारदेखि सुरु भएको छ ।
बैंकका प्रमुख कार्यकारी अधिकृत (सिइओ) सुरेन्द्रराज रेग्मीले एक विशेष समारोहबिच उक्त डिजिटल प्रतियोगिताको विधिवत् उद्घाटन गरेका हुन् । नेपालको बैंकिङ क्षेत्रमा प्रविधिको अत्याधुनिक प्रयोगलाई बढावा दिन गत वर्ष पहिलोपटक ह्याकाथन आयोजना गरेको बैंकले यस वर्ष यसको दोस्रो संस्करण सञ्चालन गरेको जनाएको छ ।
प्रविधिमा रुचि राख्ने विद्यार्थी, स्टार्टअप, डेभलपर, इन्जिनियर, डेटा वैज्ञानिक तथा अनुसन्धानकर्तालाई लक्षित गरी आयोजना गरिएको यस प्रतियोगितामा खुला आवेदनमार्फत विभिन्न उत्कृष्ट टोलीहरू छनोट भएका छन् ।
दुई चरणमा सञ्चालन हुने आवासीय प्रतियोगितामा १४ टोलीको सहभागिता रहेको बैंकले जनाएको छ । जसअन्तर्गत पहिलो चरणमा ३६ घण्टा लामो कोडिङ र दोस्रो चरणमा अनसाइट ह्याकाथन हुनेछ । उक्त ह्याकाथन प्रतियोगितामा सहभागी टोलीहरूका लागि आवासीय व्यवस्था रहेको छ । साथै, सहभागी प्रतियोगीले ३६ घण्टासम्मको कोडिङ गर्नेछन् ।
