युवतीको घाँटीमा लगाएको सुनको सिक्री चुँडालेर लुटेको आरोपमा प्रहरीले चारजनालाई पक्राउ गरेको छ। जेठ १३ गते बेलुका कोटेश्वर हुँदै बल्खु जाँदै गरेको बसभित्रबाट युवतीको सिक्री लुटेको आरोपमा प्रहरी परिसर ललितपुर र मातहत प्रहरी प्रभाग सानेपाबाट खटिएको टोलीले चारजनालाई पक्राउ गरेको हो।
पक्राउ पर्नेमा सिन्धुपाल्चोकको लिशंखुपाखर– ७ घर भई काठमाडौं– ६, बौद्ध बस्ने २९ वर्षीय जनक तामाङ र काठमाडौं–१४, कलंकी बस्ने ३० वर्षीय साइमन भन्ने मनकुमार तामाङ, ललितपुरको कोन्ञ्जोसोम– ५ घर भई ललितपुर–२८ हरिसिद्धि बस्ने २५ वर्षीय उमेश मुक्तान र काभ्रेपलाञ्चोकको नमोबुद्ध– ७ घर भई ललितपुर– ३, हरिहर भवन बस्ने ३० वर्षीय अर्जुन तामाङ रहेका छन्।
सिक्री लुटिएको सुचनापछि खटिएको प्रहरी टोलीले सानेपास्थित रिङरोड सडक खण्डमा उक्त बस रोकी यात्रीहरूको खानतलासी गर्दा लुटिएको एक तोला ९ लालको सिक्रीसहित उनीहरू पक्राउ परेकाे प्रहरीले जनाएको छ।
प्रहरी अभिलेखअनुसार उनीहरू यसअघि समेत चोरी मुद्दामा संलग्न रहेको खुलेको छ।
