ताप्लेजुङ ओलाङचुङगोलाका छेतेन टासी शेर्पाले गरे चौथोपटक कञ्चनजंघाको सफल आरोहण

विश्वको तेस्रो अग्लो कञ्चजंघा हिमालको छेतेन टाँसी शेर्पाले चौथोपटक सफल आरोहण गरेका छन्। उनले आरोहणपछि फक्ताङलुङ गाउँपालिकाको झन्डा हिमालको शिरमा फहराएका छन् । ताप्लेजुङको फक्ताङलुङ गाउँपालिका– ७ का छेतेन टाँसी शेर्पाले कञ्चनजंघा हिमालको चौथोपटक सफल आरोहण गर्दै गाउँपालिकाको लोगो तथा झन्डा चुचुरोमा फहराएका हुन् ।

लगातार चौथोपटक कञ्चनजंघा आरोहणमा सफलता हासिल गरेका शेर्पाले आफ्नो जन्मथलो र गाउँपालिकाको पहिचान विश्वसामु चिनाउने उद्देश्यले हिमालको शिरमा झन्डा फहराएको बताए। उनको यस सफलताले फक्ताङलुङ गाउँपालिका मात्र नभई समग्र ताप्लेजुङ जिल्लालाई नै गौरवान्वित बनाएको फक्ताङलुङ गाउँपालिका– ७ का वडाध्यक्ष छेतेन शेर्पाले बताए । 

कठिन मौसम र चुनौतीपूर्ण हिमाली मार्गबिच गरिएको यो सफल आरोहणलाई साहस, अनुभव र समर्पणको उत्कृष्ट उदाहरणका रूपमा हेरिएको छ । शेर्पाको यस उपलब्धिप्रति स्थानीय तह, पर्यटनकर्मी तथा पर्वतारोहीको मनोबल उच्च भएको बताइएको छ । फिक्सिङ टोलीमा इम्याजिन नेपालको नेतृत्वमा दावा ग्याल्जे शेर्पा, छेतेन टासी शेर्पा, पाकिस्तानका सोहेल सेहजाद तथा एलिट एक्स्पिडिसनका बुद्धबहादुर गुरुङ सहभागी थिए । टोलीको सफलतापछि पर्वतारोहणपछि सो टोली बेसक्यम्पमा आइपुगेको शेर्पाले जानकारी दिए । उनीहरूले जेठ ५ गते साँझ ६:३० बजे चुचुरोमा पाइला टेकेका थिए ।