विश्व स्वास्थ्य संगठन (डब्लुएचओ) ले एट्लान्टिक महासागरमा रहेको क्रुज जहाजमा शंकास्पद हान्टाभाइरसको प्रकोपपछि तीनजनाको मृत्यु भएको बिबिसीले जनाएको छ । अर्जेन्टिनाबाट केप भर्डे जाँदै गरेको एमभी होन्डियस जहाजमा सवार एकजनामा भाइरस पुष्टि भएको र पाँचजना शंकास्पद केस रहेको रिपोर्ट गरिएको छ ।
६९ वर्षीय एक बेलायती नागरिक दक्षिण अफ्रिकाको जोहानेसबर्गस्थित एक अस्पतालको सघन उपचार कक्षमा छन् । उनलाई भाइरस भएको बिबिसीले उल्लेख गरेको छ । बेलायतको विदेश मन्त्रालयले बेलायती नागरिकलाई सहयोग गर्न तयार रहेको बताएको छ । हान्टाभाइरस सामान्यतया मुसाबाट मानिसमा उनीहरूको दिसा, र्याल वा पिसाबमार्फत सर्छ । यसले गम्भीर श्वासप्रश्वास रोग निम्त्याउन सक्छ । यो भाइरस बिरलै मानिसमा सर्ने विश्वास गरिन्छ ।
एमभी होन्डियस टुर कम्पनी ओसनवाइड एक्सपिडिसनद्वारा सञ्चालित छ । यसको वेबसाइटमा रहेको यात्रा कार्यक्रमअनुसार, एमभी होन्डियस २० मार्चमा दक्षिणी अर्जेन्टिनाको उसुआइयाबाट प्रस्थान गरेको थियो र मे ४ मा केप भर्डेमा आफ्नो यात्रा पूरा गरेको थियो, यो राजधानी प्रेया बाहिर रोकिएको छ । यसलाई १०७.६ मिटर (३५३ फिट) अग्लो ध्रुवीय क्रुज जहाजको रूपमा वर्णन गरिएको छ, जसमा ८० क्याबिनमा १७० यात्रु ५७ चालक दलका सदस्य, १३ गाइड र एक चिकित्सकका लागि ठाउँ छ ।
दक्षिण अफ्रिकाको स्वास्थ्य मन्त्रालयका प्रवक्ता फोस्टर मोहालेले बिबिसीलाई बताएअनुसार जहाजमा विभिन्न देशका लगभग १५० पर्यटक थिए । मृत्यु भएका तीनजनामध्ये ७० वर्षीय पुरुष र ६९ वर्षीया महिला डच जोडी थिए । स्वास्थ्य अधिकारीले तेस्रा व्यक्ति अचानक बिरामी परेको र उनलाई ज्वरो, टाउको दुख्ने, पेट दुख्ने र पखाला लाग्ने समस्या देखिएको थियो । दक्षिण एट्लान्टिकमा रहेको बेलायती क्षेत्र सेन्ट हेलेना टापुमा आइपुग्दा उनको मृत्यु भयो । । गत वर्ष ओस्कर विजेता अभिनेता जिन ह्याकम्यानकी श्रीमतीको मार्च २०२५ मा हान्टाभाइरससँग सम्बन्धित श्वासप्रश्वास रोगबाट मृत्यु भएपछि उक्त भाइरस हेडलाइनमा थियो ।
