उदयपुरको चौदण्डीगढी नगरपालिका जातीय छुवाछुत मुक्त घोषणा

शनिबार, २६ बैशाख, २०८३
डिजिटल संस्करण

‘हाम्रो सरोकार, हाम्रो प्रतिबद्धताः जातीय छुवाछुत मुक्त चौदण्डीगढी नगरपालिका’ भन्ने मूल नाराका साथ उदयपुरको चौदण्डीगढी नगरपालिका औपचारिक रूपमा जातीय भेदभाव तथा छुवाछुत मुक्त नगरपालिका घोषणा गरिएको छ । 

सामाजिक न्याय, समानता र मानवीय सम्मानलाई संस्थागत गर्दै जातीय विभेदविरुद्ध प्रतिबद्धता व्यक्त गर्ने उद्देश्यले नगरपालिकाले उक्त घोषणा शनिबार एक कार्यक्रमबीच गरेको हो ।

बेल्टार बसपार्कमा आयोजित ‘जातीय भेदभाव तथा छुवाछुत मुक्त नगरपालिका घोषणा कार्यान्वयन अभियान’ कार्यक्रममा चौदण्डीगढी नगरपालिकाका नगर प्रमुख कालुमान लामाले नगरलाई औपचारिक रूपमा जातीय छुवाछुत मुक्त घोषणा गरेका थिए । 

कार्यक्रममा विभिन्न राजनीतिक दलका प्रतिनिधि, जनप्रतिनिधि, दलित अधिकारकर्मी, नागरिक समाजका अगुवा तथा स्थानीय समुदायको उल्लेख्य उपस्थितिबीच चौदण्डीगढी नगरपालिका जतीय छुवाछुतमुक्त भएको उद्घोष गरिएको छ ।

घोषणा कार्यक्रममा बोल्दै नगर प्रमुख लामाले आजको दिन चौदण्डीगढी नगरपालिकाको सामाजिक इतिहासमा महत्वपूर्ण र प्रेरणादायी क्षणका रूपमा स्थापित भएको बताए । उनले जातीय विभेद र छुवाछुतजस्ता अमानवीय व्यवहारको अन्त्य गर्दै समानता, सहअस्तित्व र सामाजिक एकताको नयाँ सन्देश प्रवाह गर्न नगरपालिकाले यो कदम चालेको दाबी गरेका छन् । 

उनले भनेका छन्, ‘आजदेखि चौदण्डीगढी नगरपालिका औपचारिक रूपमा जातीय छुवाछुत मुक्त नगरका रूपमा अघि बढेको छ,’ नगर प्रमुख लामाले भने, ‘यो केवल घोषणा मात्र होइन, सामाजिक रूपान्तरणको साझा अभियान हो । यसको प्रभावकारी कार्यान्वयनका लागि स्थानीय सरकार मात्र नभई राजनीतिक दल, नागरिक समाज, समुदाय तथा सम्पूर्ण नगरवासीको सक्रिय सहयोग र प्रतिबद्धता आवश्यक छ ।’

संविधानले सुनिश्चित गरेको समानताको अधिकारलाई व्यवहारमा कार्यान्वयन गर्न नगरपालिकाले दलित समुदायको सशक्तीकरण, सामाजिक न्याय तथा समावेशी विकासलाई प्राथमिकतामा राख्दै विभिन्न कार्यक्रम सञ्चालन गरिरहेको छ । साथै, जातीय विभेद र छुवाछुत अन्त्यका लागि नगरपालिकाले दलित सशक्तीकरण ऐन समेत पारित गरिसकेको स्मरण गराउँदै त्यसको प्रभावकारी कार्यान्वयनलाई अझ सुदृढ बनाइने लामाले जानकारी दिए । 

कार्यक्रममा सहभागी दलित अधिकारकर्मी लगायत वक्ताहरूले जातीय विभेदको अन्त्यका लागि कानुनी व्यवस्था मात्र पर्याप्त नहुने उल्लेख गर्दै व्यवहारिक परिवर्तन, जनचेतना अभिवृद्धि र सामुदायिक सहकार्य अपरिहार्य रहेको धारणा राखेका थिए । उनीहरूले विभेदरहित समाज निर्माणका लागि स्थानीय तह, शैक्षिक संस्था, राजनीतिक नेतृत्व, नागरिक समाज तथा युवाहरूको भूमिका अझ प्रभावकारी हुनुपर्नेमा जोड दिए । 

नगर स्तरीय दलित समन्वय समिति चौदण्डीगढी नगरपालिका, बेल्टारको आयोजनामा सम्पन्न कार्यक्रम समितिका अध्यक्ष भिम परियारको अध्यक्षतामा सम्पन्न भएको थियो । कार्यक्रममा जातीय भेदभाव अन्त्य र समतामूलक समाज निर्माणको प्रतिबद्धतासहित सहभागीहरूले साझा ऐक्यबद्धता व्यक्त गरिएको छ ।

सुझावित समाचार