भूमिहीन सुकुमवासी अव्यवस्थित संघर्ष समितिद्वारा आन्दोलन घोषणा

नेपाल भूमिहीन सुकुमवासी अव्यवस्थित संघर्ष समिति रुपन्देहीले आन्दोलनका कार्यक्रम घोषणा गरेकाे छ। समितिले मंगलबार बुटवलमा पत्रकार सम्मेलन गरी आन्दोलनका कार्यक्रम घोषणा गरेको हो ।

समितिका संयोजक खगेन्द्र पौडेलले बिहीबार बुटवलमा बृहत् विरोध र्याली  प्रदर्शन गर्ने बताए । बुटवलको राजमार्ग चौराहाबाट मिलन चोक–अस्पताल रोड हुँदै ट्राफिक चोकसम्म विरोध प्रदर्शन गरिने आयोजकले जनाएका छन् । विरोधका क्रममा सरकारी निकायमा ज्ञापनपत्र बुझाउने कार्यक्रम रहेको पनि उनीहरूले बताएका छन् ।  

सरकारले आवश्यक तयारी र छलफलविना भूमिहीन सुकुमवासी र अव्यवस्थित बसोबासीहरूलाई उठीवास लगाउने गरी डोजरआतंक मच्चाएको भन्दै समितिका संयोजक पौडेलले विगतमा नापजाँच भएका जग्गाको तत्काल लालपुर्जा उपलब्ध गराउनुपर्ने माग गरे ।

केही दिनअगाडि बुटवलको वडा नम्बर ४ अदालतअगाडिका नाैवटा घरटहरा डोजर लगाएर हटाइएको थियो ।