बलात्कार कसुरमा १७ वर्ष कैद सजाय पाएका दाजुभाइ पाँच वर्षपछि पक्राउ

बलात्कार कसुरमा सजाय पाएका फरार दाजुभाइलाई मोरङ प्रहरीले पक्राउ गरेको छ।

मोरङको बेलबारी नगरपालिका– ५ का ५७ वर्षीय धनपाल भगत थारू र उनका दाजु भूपाल भगतलाई मोरङ प्रहरीले दोषी ठहर भई फरार भएको पाँच वर्षपछि पक्राउ गरेको हो।

प्रहरीका अनुसार जिल्ला अदालत मोरङबाट सफाइ पाएका भगत दाजुभाइलाई उच्च अदालत विराटनगरले ४ फागुन ०७७ मा जबर्जस्ती करणी मुद्दामा दोषी ठहर गर्दै जनही १७ वर्ष पाँच महिना २१ दिन कैद सजाय तोकेको थियो। तर, ‘फरार’ रहेका उनीहरू आफ्नो घरमै बस्दै आएका थिए।