गुल्मीमा पिकअप गाडी घरमा ठोक्किँदा दुईको मृत्यु, १२ घाइते

गुल्मीको गुल्मीदरबार गाउँपालिका–४, मिसुकामा आइतबार पिकअप गाडी दुर्घटना हुँदा दुईजनाको मृत्यु भएको छ । १२ जना घाइते भएका छन् ।

गुल्मी दरबारकै वीरबास बजारबाट मिसुकाका लागि छुटेको लु १ च ४९०६ नम्बरको पिकअप गाडी ब्रेक फेल भएर स्थानीय पम्फा श्रेष्ठको घरमा ठोक्किएर दुर्घटना भएको चालकले बताएको जिल्ला प्रहरी कार्यालय गुल्मीका प्रहरी नायब उपरीक्षक गंगाबहादुर सारूले बताए ।

उनका अनुसार दुर्घटनामा परी मिसुकाकी ३५ वर्षीया कृष्णा ढेगा र ४० वर्षीया मीना सलामीको मृत्यु भएको छ । मिसुका गाउँका महिला स्थानीय वीरबास बजारमा किनमेल गरेर फर्कँदै गरेको गाडी दुर्घटनामा परेको हो ।  

प्रहरी नायब उपरीक्षक सारूका अनुसार डबल क्याब बोलेरो गाडीमा चालकसहित पाँचजनाको सिट पास हुने गरेको छ । तर, उक्त गाडीमा चालकसहित १४ जना थिए । ‘यसबारे अनुसन्धान भइरहेको छ,’ उनले भने । 

प्रहरीका अनुसार दुर्घटनामा चालकसहित १२ जना घाइते भएका छन् । तीमध्ये गम्भीर र मध्यम घाइते १० जनालाई थप उपचारका लागि पाल्पा लगिएको छ । मिसुकाका ४० वर्षीया जमुना ढेगा, ४५ वर्षीया सुमित्रा ढेगा, ३६ वर्षीया पार्वती ढेगा, ४४ वर्षीया खगी ढेगा, ३० वर्षीया  पम्फा ढेगा, ३३ वर्षीया कुमारी पुन ढेगाको अवस्था गम्भीर छ ।

मध्यम अवस्थाका घाइते २४ वर्षीया निर्मला ढेगा, उनकी छोरी ३ वर्षकी छाया ढेगा, ३१ वर्षकी माया ढेगा, ५५ वर्षीया नैना ढेगा हुन् । ७ वर्षका सनिम ढेगा र चालक ३८ वर्षका शेरबहादुर ढेगाको अवस्था सामान्य रहेकोले शृंगा प्राथमिक स्वास्थ्य केन्द्रमा उपचार भइरहेको छ ।