राष्ट्रिय स्वतन्त्र पार्टीले सुदूरपश्चिम प्रदेशअन्तर्गत तराईका दुई जिल्ला कैलाली–कञ्चनपुरमा ‘क्लिनस्विप’ गरेको छ । सुदूरपश्चिमका १६ मध्ये आधा निर्वाचन क्षेत्र यी दुई जिल्लामा पर्छन् । रास्वपाका उम्मेदवारले कैलालीका पाँच र कञ्चनपुरका तीनवटै निर्वाचन क्षेत्रमा भारी मतान्तरसहित जित हासिल गरेका छन् ।
कैलाली क्षेत्र नम्बर १ मा कोमल ज्ञवाली, २ मा केपी खनाल, ३ मा जगतप्रसाद जोशी, ४ मा खेमराज कोइराला र क्षेत्र नम्बर ५ मा आनन्दबहादुर चन्द निर्वाचित भएका छन् । कैलाली १ मा ज्ञवाली १७ हजार १७ हजार ८२६ मत ल्याएर निर्वाचित हुँदा निकटतम प्रतिस्पर्धी नेपाली कांग्रेसका जनकराज चौधरीले १२ हजार ८६७ मत प्राप्त गरे ।
ज्ञवाली नागरिक उन्मुक्ति पार्टीबाट केही समयअघि मात्र रास्वपा प्रवेश गरेकी थिइन् । टीकापुर नगरपालिकाको प्रमुखबाट राजीनामा दिएर चुनावी प्रतिस्पर्धामा उत्रिएका नेकपाका राममलाल डगौरा थारू तेस्रो भए भने एमालेका द्वारिकाप्रसाद न्यौपानेले धरौटी जोगाउन सकेनन् ।
क्षेत्र नम्बर २ मा निर्वाचित खनालले १९ हजार ५७ मत पाए भने नागरिक उन्मुक्ति पार्टी नेपालका पतिराम चौधरी ११ हजार ९४९ मत ल्याएर निकटतम प्रतिस्पर्धी बने । ३ मा २० हजार ३५९ मत पाएर निर्वाचित हुँदा निकटतम प्रतिस्पर्धी नेपाली कम्युनिस्ट पार्टीका वीरमान चौधरीले ११ हजार ९८३ मत पाए । क्षेत्र नम्बर ४ मा कोइराला २८ हजार ५५६ मत ल्याएर निर्वाचित भए भने निकटतम प्रतिस्पर्धी कांग्रेसका गोरखबहादुर विष्टले ११ हजार ३०१ मत प्राप्त गरे । यो क्षेत्रमा एमाले उपमहासचिव लेखराज भट्ट नौ हजार ४४४ मतसहित तेस्रो भए ।
कैलाली ५ मा चन्द भारी मतान्तरसहित निर्वाचित भए । उनले ३१ हजार ९५३ मत पाउँदा निकटतम प्रतिस्पर्धी नेपाली कांग्रेसका नरनारायण शाहले ११ हजार ९५८ मत पाए । यो क्षेत्रमा नेकपाका प्रेम आले तेस्रो हुँदा एमालेका यज्ञराज ढुंगानाले धरौटी जोगाउन सकेनन् । कञ्चनपुर १ मा रास्वपाका जनकसिंह धामी २४ हजार ३३२ मत ल्याएर निर्वाचित हुँदा नेकपाकी विना मगर ११ हजार ११० मत ल्याएर निकटतम प्रतिस्पर्धी बनिन् । क्षेत्र नम्बर २ मा दीपकराज बोहराले कांग्रेस नेता एनपी साउदलाई २३ हजार मतान्तरले पराजित गरे । बोहराले ३३ हजार ९५२ मत प्राप्त गर्दा साउदले १० हजार ८२७ मत पाए ।
निवर्तमान गृहमन्त्री रमेश लेखकको क्षेत्र कञ्चनपुर ३ मा रास्वपाकै ज्ञानेन्द्रसिंह महता २७ हजार ११८ मत ल्याएर निर्वाचित हुँदा निकटतम प्रतिस्पर्धी कांग्रेसका हरिप्रसाद बोहराले नौ हजार ४४३ मत प्राप्त गरे । गत निर्वाचनमा यी आठ सिटमध्ये कांग्रेसले चार, तत्कालीन नागरिक उन्मुक्ति पार्टीले तीन र एमालेले एक सिट जितेको थियो । रास्वपाले सुदूरपश्चिमका १६ मध्ये १० निर्वाचन क्षेत्रमा जित हासिल गरेको छ । रास्वपाले डडेलधुरा र बैतडीमा पनि जित हासिल ग¥यो ।
कांग्रेसले सुदूरपश्चिममा आफ्नो बलियो पकड भएका र प्रभावशाली नेताका क्षेत्र यसपालि गुमाएको छ । गत निर्वाचनमा सुदूरपश्चिमका आठ क्षेत्र जितेको कांग्रेस यसपालि तीन क्षेत्रमा खुम्चिएको छ । एमालेले तीन सिट जितेको छ ।
कांग्रेसका निवर्तमान सभापति शेरबहादुर देउवाको गृहजिल्ला डडेलधुरा पनि कांग्रेसले यसपालि गुमायो । रास्वपाले ३४ वर्षपछि कांग्रेसको गढ भत्काएको छ । रास्वपाका डा. ताराप्रसाद जोशी १९ हजार १३१ मत ल्याएर निर्वाचित हुँदा कांग्रेसका नैनसिंह महर १२ हजार १२१ मतसहित निकटतम प्रतिस्पर्धी बने । देउवाले डडेलधुराबाट ०४८ सालयताका सातवटै संसदीय चुनाव जितेका थिए ।
अछाम, बाजुरा, बझाङ र दार्चुलामा भने रास्वपाको प्रभाव कम देखिएको छ । रास्वपाको लहरबिच कांग्रेस–एमालेले तीन–तीन सिट जित्दा सुदूरपश्चिममा नेकपा भने नील भएको छ । नेकपाका नेता भीम रावल अछाम क्षेत्र नम्बर १ मा पराजित भए । उनलाई कांग्रेसका भरतकुमार स्वाँरले पराजित गरे । स्वाँरले १० हजार ७५९ र रावलले १० हजार २३३ मत पाए । रास्वपाका ओमप्रकाश रावल एक हजार ७३९ मतसहित चौथो भए ।
बैतडीमा रास्वपाका हरिमोहन भण्डारी २२ हजार १३४ मत ल्याएर निर्वाचित हुँदा निकटतम प्रतिस्पर्धी कांग्रेसका चतुरबहादुर चन्दले १८ हजार १९४ मत पाए । दार्चुलामा एमालेका गणेशसिंह ठगुन्ना १८ हजार ८९१ मतसहित निर्वाचित भए । कांग्रेसका धर्मानन्द जोशी १५ हजार ८३६ मत ल्याएर दोस्रो भएका छन् । बझाङमा एमालेकै ऐनबहादुर महर निर्वाचित भए । महर १८ हजार ५४३ मतसहित निर्वाचित हुँदा कांग्रेसका प्रकाश स्नेहीले १६ हजार ३०४ मत पाए । बझाङमा नेकपा तेस्रो र रास्वपा चौथो भएको छ ।
डोटी र बाजुरामा कांग्रेसले जितेको छ । डोटीमा कांग्रेसका भरतबहादुर खड्का १४ हजार ८९७ मत ल्याएर निर्वाचित भए भने निकटतम प्रतिस्पर्धी एमालेका दीपकबहादुर धामीले १४ हजार ११० मत पाए । बाजुरामा कांग्रेसका जनकराज गिरी १७ हजार १७३ मत ल्याएर निर्वाचित भएका छन् । उनका निकटतम प्रतिस्पर्धी एमालेका लालबहादुर थापाले १६ हजार ६३३ मत पाए ।
अछाम २ मा एमालेका यज्ञबहादुर बोगटी नौ हजार ५१८ मत ल्याएर निर्वाचित हुँदा उनका निकटतम प्रतिस्पर्धी कांग्रेसका पुष्पबहादुर शाहले नौ हजार ४६ मत पाए । यो क्षेत्रमा रास्वपाबाट उम्मेदवार बनेका बालेन शाहनिकट भूपदेव शाह चार हजार ५६२ मत ल्याएर चौथो भए ।
