भुवन नगरकोटीले सूर्य नेपाल गल्फ टुर २०२५–२६ अन्तर्गत सूर्य नेपाल एनपिजिए टुर च्याम्पियनसिपको पहिलो दिन शीर्ष स्थान हात पारेका छन् । बर्दीवासस्थित पार–७२ मिथिला नगरी आर्मी गल्फ क्लबमा मंगलबार पहिलो चरणमा भुवनले ५ अन्डर ६७ को उत्कृष्ट कार्ड बनाउँदै दुई स्ट्रोकको अग्रता बनाएका छन् ।
दोस्रो स्थानमा रहेका भुवनकुमार रोक्काले ३ अन्डर ६९ स्कोर गरेका छन् । सुमन राई र धनबहादुर थापा १ अन्डर ७१ स्कोरसहित संयुक्त रूपमा तेस्रो स्थानमा रहेका छन् । टंकबहादुर कार्कीले इभन–पार ७२ खेल्दै पाँचौँ स्थानमा पहिलो दिनको खेल सकाए । एमेच्योर प्रकृत तामाङ तथा प्रोफेसनल रमेश अधिकारी, नीरज तामाङ र दिनेश प्रजापति संयुक्त रूपमा छैटौँ स्थानमा छन् । शीर्ष स्थानमा रहेका नेपालका पूर्व नम्बर एक प्रोफेसनल गल्फर भुवनले फ्रन्ट नाइन ३ अन्डर ३३ र ब्याक नाइन २ अन्डर ३४ खेल्दै समग्रमा ५ अन्डर ६७ को स्कोर निकाले । उनले दोस्रो, चौथो, सातौँ र नवौँ होलमा बर्डी प्रहार गर्दा आठौँ होलमा एक सट खेर फाले ।
रोक्कालाई लगातार तीन वर्डी
दोस्रो स्थानको रोक्काले फ्रन्ट नाइन इभन पार ३६ र ब्याक नाइन ३ अन्डर ३३ खेले । उनले पहिलो, तेस्रो र सातौँ होलमा बर्डी निकाले त्यसपछि उनले दोस्रो, पाँचौँ र नवौँ होलमा बोगी खेपे । ब्याक नाइनमा उनले १३औँ, १४औँ र १५औँ होलमा लगातार तीन बर्डी प्रहार गरेका थिए । सुमन राईले फ्रन्ट नाइन २ ओभर ३८ खेले पनि ब्याक नाइनमा ३ अन्डर ३३ को उत्कृष्ट पुनरागमन गरे ।
