उपाधि दाबेदार चर्च ब्वाइज युनाइटेडले राष्ट्रिय लिग फुटबल प्रतियोगितामा प्रभावशाली प्रदर्शन गर्न सकेको छैन । लिगअन्तर्गत बिहीबार चर्च ब्वाइज नेपाल एपिएफ क्लबसँग ४–१ ले पराजित भयो । च्यासल मैदानमा एपिएफले चर्च ब्वाइजविरुद्ध उत्कृष्ट खेल प्रदर्शन गर्न सफल भयो । एपिएफको जितमा युवराज खड्काले दुई गोल गरेका थिए । समीराज थोकर र प्रदीप खड्काले समान एक गोल गरे । चर्च ब्वाइजका मिलन राईले एक गोल फर्काएका थिए ।
जितसँगै एपिएफ ६ अंकसहित शीर्ष स्थानमा फर्किएको छ । लिगमा एपिएफ, लालीगुराँस र मच्छिन्द्र एफसीले मात्र लगातार दुई खेलमा जित निकालेका छन् । लालीगुराँस र एपिएफले समान दुई खेल जित्दा पाँच गोल विपक्षी पोस्टमा गरेका छन् । ०७९ को सहिद स्मारक ‘ए’ डिभिजन लिग विजेता चर्च ब्वाइज भने दोस्रो खेलमा पनि ३ अंक जोड्न असफल भयो ।
तीनजना राष्ट्रिय खेलाडी समावेश एपिएफले लगातार दोस्रो खेलमा जित निकालेको हो । उसले पहिलो खेलमा ललितपुुरको फ्रेन्ड्स क्लबलाई १–० ले हराएको थियो ।
एरिक विष्टको कप्तानीमा रहेको चर्च ब्वाइज आफ्नो पहिलो खेलमा श्री भगवतीसँग १–१ को बराबरीमा रोकिएको थियो । एपिएफविरुद्धको खेलमा चर्च ब्वाइजका लागि दीपक कार्कीले कप्तानी गरेका थिए । प्रशिक्षक राजेन्द्र तामाङले एपिएफलाई राष्ट्रिय लिगमा शीर्ष चारमा पुर्याउने बताएका छन् ।
एपिएफले पहिलो र दोस्रो हाफमै समान दुई गोल गरेको थियो । समीरले खेलको २२औँ मिनेटमा एपिएफलाई १–० को अग्रता दिलाएका थिए । प्रदीपले ३८औँ मिनेटमा एपिएफलाई २–० को स्थितिमा राखे । पहिलो हाफमा चर्च ब्वाइजले राम्रो मुभ बनाउन सकेन । खेलको ६०औँ मिनेटमा एपिएफका युवराजले ३–० का लागि गोल गरे । उनले ७७औँ मिनेटमा टोलीका लागि चौथो तथा व्यक्तिगत दोस्रो गोल गरेका हुन् । खेलको ८२औँ मिनेटमा मिलन राईले चर्च ब्वाइजलाई ४–१ को गोलअन्तरमा झारे ।
एनआरटीले काँक्रेबिहारलाई हरायो
राष्ट्रिय लिगमा न्युरोड टिम (एनआरटी)ले काँक्रेबिहार युथ क्लबलाई २–० ले हराएको छ । एनआरटीको जितमा तिमोथी र रनदीप पौडेलले एक–एक गोल गरेका थिए । एनआरटीले तीन खेलबाट ६ अंक जोडेर तेस्रो स्थान रक्षा गरेको छ । सुर्खेतको काँक्रेबिहारले लगातार तेस्रो हार सामना गरेको छ । एन्फा कम्प्लेक्समा एनआरटीले काँक्रेबिहारलाई पहिलो हाफमै २–० ले पछि राखेको थियो । खेलको दोस्रो मिनेटमै तिमोथीले १–० का लागि गोल गरे । खेलको ३४औँ मिनेटमा रनदीपले एक गोल थपे ।
