पूर्वकप्तान रुविना क्षेत्रीले आइसिसी महिला टी–२० आईमा हजार रन पुरा गरेकी छिन् । रुविनाले त्रिवि क्रिकेट मैदानमा बिहीबार आइसिसी टी–२० विश्वकप ग्लोबल छनोटमा नेदरल्यान्ड्सविरुद्ध ३७ रन बनाएपछि हजार अन्तर्राष्ट्रिय रन पूरा गरेकी हुन् । नेपाली राष्ट्रिय महिला क्रिकेटमा हजार रन पार गर्ने उनी दोस्रो खेलाडी हुन् । यसअघि कप्तान इन्दु बर्माले अन्तर्राष्ट्रिय टी–२० आईमा यो सफलता प्राप्त गरेकी थिइन् । इन्दुले गत वर्ष अक्टोबरमा मलेसियासँगको सिरिजमा हजार रन पूरा गर्ने रेकर्ड बनाएकी थिइन् ।
नेदरल्यान्ड्ससँगको महत्वपूर्ण खेलमा नेपाल २ रनले पराजित हुँदा रुविनाले ३७ रन बनाएकी थिइन् । लक्ष्य पछ्याएको इनिङ्समा रुविनाले १९.५ ओभरमा २ रन लिँदै हजार रनको कोसेढुंगा पूरा गरिन् । समग्रमा उनले ८१ टी–२० आईमा ७१ इनिङ्स ब्याटिङ गरी एक हजार पाँच रन बटुलेकी छिन् । उनले टी–२० आईमा समान एक शतक तथा अर्धशतकीय इनिङ्स खेलेकी छिन् । रुविनाले आफ्नो अन्तर्राष्ट्रिय करिअरमा तटस्थ भूमिमा धेरै रन बटुलेकी छिन् । उनले सन् २०१९ देखि ०२६ सम्म तटस्थ भूमिमा ४२ टी–२० आईमा ३५ इनिङ्स ब्याटिङ गरी ५३३ रन बनाएकी छिन् ।
नेपाली क्रिकेट इतिहासमा पहिलो अन्तर्राष्ट्रिय शतकीय इनिङ्स उनकै नाममा छ । १३ फेब्रुअरी २०२४ मा उनले मलेसियामा माल्दिभ्सविरुद्ध ११८ रन बनाएकी थिइन् । यसक्रममा उनले ५९ बलमा १० चौका र पाँच छक्का प्रहार गरेकी थिइन् । रुविनाले सबैभन्दा कम रन घरेलु मैदानमा बनाएको देखिन्छ । त्रिवि मैदानमा सन् २०१९ देखि ०२६ सम्म १६ टी–२० आई खेलमा उनले १४ इनिङ्स ब्याटिङ गरी १७४ रन बटुलेकी थिइन् । यसैगरी, अवे मैदानमा उनले २३ टी–२० आईमध्ये २२ इनिङ्समा २९८ रन जोडेकी छिन् । सन् २०२३ को सिजनमा उनी उत्कृष्ट फर्ममा थिइन् । यसवेला उनले १८ टी–२० आईमा २२२ रन जोडेकी थिइन् । सन् २०१९ देखि ०२३ सम्म महिला टोलीको कप्तानी गर्दै ४६ टी–२० खेलमा उनले ५०२ रन बनाइन् । वर्तमान कप्तान इन्दु बर्माले तीन वर्षभित्र ३५ टी–२० आईमा ५०३ रन बनाएकी छिन् । रुविनाले टोलीको नेतृत्व नगरेको अवस्थामा ३५ टी–२० आईमा ५०३ रन जोडेकी थिइन् ।
रानामगरलाई ८ रन आवश्यक
पहिलो पुस्ताकी खेलाडी सीता रानामगरलाई टी–२० आईमा हजार रन पूरा गर्र्न ८ रनको खाँचो छ । डेढ वर्षपछि नेपाली टोलीमा फर्किएकी सीताले ६५ टी–२० आईमा ६१ इनिङ्स ब्याटिङ गरी ९९२ रन बनाएकी छिन् । अन्तर्राष्ट्रिय करिअरमा उनले एक अर्धशतक बनाएकी छिन् । ग्लोबल टी–२० छनोटमा उनले नेदरल्यान्ड्सविरुद्ध २७ रन बनाएकी थिइन् । सीताले तटस्थ भूमिमा ३५ अन्तर्राष्ट्रिय खेलमा ५५५ रन र घरेलु मैदानमा १४ टी–२० आईमा १२३ रन जोडेकी छिन् । अवे भूमिमा उनले १६ खेलमा ३२४ रन बटुलेकी छिन् । सन् २०२३ को सिजनमा उनले करिअरकै उत्कृष्ट ब्याटिङ प्रदर्शन गरी १८ टी–२० आई खेलमा २५० रन बनाइन् । सन् २०२५ को सिजनमा उनले सात खेलमा ५१ रन मात्र जोडिन् । सीतालाई मलेसियाको भूमि निकै फापेको देखिन्छ । उनले मलेसियामा २६ टी–२० आई खेलमा ३१६ रन बनाएकी छिन् । त्यसपछि उनले थाइल्यान्डमा ११ टी–२० आईमा २१५ रन बनाएको रेकर्ड छ ।
सुपर सिक्समा पुग्ने नेपालको सम्भावना कमजोर
आइसिसी ग्लोबल टी–२० विश्वकप छनोटको सुपर सिक्समा पुग्ने नेपालको सम्भावना कमजोर बनेको छ । छनोटअन्तर्गत समूह ‘बी’मा नेपालले लगातार दुई खेल गुमाएको छ । त्रिवि मैदानमा नेपाल नेदरल्यान्ड्ससँग २ रनले चुकेको थियो । पहिलो ब्याटिङ गरेको नेदरल्यान्ड्सले २० ओभरमा पाँच विकेट गुमाएर १४० रन बनायो । प्रत्युत्तरमा नेपालले २० ओभरमा सात विकेटको क्षतिमा १३८ रन जोड्दा नेदरल्यान्ड्सले २ रनले बाजी मा¥यो । नेपाल पहिलो खेलमा थाइल्यान्डबाट आठ विकेटले पराजित भएको थियो । लगातार तीन जितका साथ नेदरल्यान्ड्स सुपर सिक्समा पुगेको छ ।
प्रत्येक समूहबाट समान तीन शीर्ष टोली सुपर सिक्समा पुग्नेछन् । सुपर सिक्सबाट चार टोलीले आगामी जुनमा इंग्ल्यान्डले आयोजना गर्ने महिला टी–२० विश्वकपमा स्थान बनाउनेछन् । नेपाल अंकविहीन छ । थाइल्यान्डले दुई खेलबाट ४ तथा स्कटल्यान्डले पनि दुई खेलबाट २ अंक बटुलेका छन् । नेपालले आगामी खेलमा स्कटल्यान्ड र जिम्बावेको सामना गर्नेछ । यी दुवै खेलमा जित निकाल्दा नेपालको ४ अंक हुनेछ । तर, स्कटल्यान्डले एक खेल मात्र जित्दा सुपर सिक्समा पुग्नेछ । गणितीय रूपमा सुपर सिक्समा पुग्ने आशा जीवित रहे पनि नेपालको भविष्य स्कटल्यान्डमाथि नै निर्भर छ ।
नेदरल्यान्डसँगको खेलमा नेपाललाई अन्तिम ओभरमा १३ रन आवश्यक थियो । अन्तिम ओभरमा नेपालले १० रन मात्र जोड्दा २ रनको नमिठो हार सामना ग¥यो । नेपालको ब्याटिङमा रुविनाले ३२ बलमा ३७ रन बनाइन् । सीताले १२ बलमा २७ रन जोडे पनि जितका लागि काफी भएन । उनले १२ बलमा चार चौका र एक छक्का प्रहार गरेकी थिइन् । रुविनाले पाँच चौका प्रहार गरिन् । ओपनर विन्दु रावलले १५ बलमा १८ तथा सम्झना खड्काले आठ बलमा १४ बनाए । नेपालको ब्याटिङमा रुविना र सीताले आठौँ विकेटका लागि २३ बलमा ४५ रनको साझेदारी गरेका थिए ।
ब्याटिङमा साझेदारी भएन
रुविना क्षेत्री, पूर्वकप्तान, नेपाल
खेलको मुख्य टर्निङ प्वाइन्ट नै राम्रोसँग साझेदारी गर्न नसक्नु हो । खेलमा नियमितजसो विकेट झरिरहेको थियो । ब्याटिङ विकेटमा अनावश्यक सट रोज्दा विकेट गएको हो । अहिले महिला टोली संक्रमणकालीन अवस्थामा छ । यस्तोमा नयाँ खेलाडीलाई मोमेन्टम प्राप्त गर्ने अवसर छ । खेलाडीलाई पनि धैर्यसाथ समय दिन र बाहिरबाट धेरै दबाब दिनुहुँदैन । यद्यपि, टोलीमा ब्याटिङ, फिटनेस र फिल्डिङमा सुधार आइरहेको छ ।
