नेपाली कांग्रेसले लामो समयदेखि निष्क्रिय रहेका तथा विविध कारणले पार्टीबाट अलग भएका नेता-कार्यकर्तालाई पुनः पार्टीमा फर्कन आग्रह गरेको छ।
निर्वाचन आयोगबाट आधिकारिक मान्यता प्राप्त गरेपछि बसेको केन्द्रीय कार्यसमितिको दोस्रो बैठकले यस्तो निर्णय गरेको हो। बैठकपछि प्रवक्ता देवराज चालिसेले पार्टीमा टाढिएका सबैलाई फेरि कांग्रेसको मूलधारमा फर्कन आह्वान गरिएको जानकारी दिए।
उनका अनुसार पार्टीलाई अझ सुदृढ बनाउने उद्देश्यसहित निष्क्रिय तथा अलग भएका सदस्यहरूलाई पुनः सक्रिय सहभागिताका लागि आह्वान गरिएको हो।
त्यसैगरी, आगामी फागुन २१ गते हुने निर्वाचनलाई लक्षित गर्दै पार्टीका सम्पूर्ण तह, मतदाता तथा देश–विदेशमा रहेका कांग्रेस समर्थकहरूलाई एकताबद्ध भएर सक्रिय हुन अपिल गरिएको छ।
