एमाले अध्यक्ष केपी ओलीले सत्ताका लागि जे पनि सौदाबाजी गर्ने पपुलिस्ट पात्रहरूले देशमा भयावह भूराजनीतिक जोखिम निम्त्याउन सक्ने खतरा औँल्याएका छन् । शनिबारबाट जावलाखेलमा सुरु भएको दोस्रो केन्द्रीय कमिटी बैठकमा राजनीतिक प्रतिवेदन पेस गर्दै उनले भूराजनीतिक जोखिमको खतरा औँल्याएका हुन् ।
‘सत्तामा जान जस्तोसुकै भावना पनि बेच्ने र जस्तोसुकै सम्झौता गर्ने पपुलिस्ट पात्रहरूले हाम्रोजस्तो देशमा भयावह भूराजनीतिक जोखिम पनि निम्त्याउन सक्छन् । यसैले यतिवेला राजनीतिक पार्टीहरूकै भूमिकाको बलमा लोकतन्त्र बलियो हुन्छ,’ ओलीले प्रतिवेदनमा भनेका छन्, ‘तर यतिवेला विचारविहीन, कुनै सार्वजनिक जवाफदेहिता नभएका र सामाजिक नैतिकताका दृष्टिले विवादास्पद व्यक्तिहरू एक ठाउँमा जम्मा भएर लोकतान्त्रिक प्रणाली, विचार र संस्थाहरूलाई चुनौती दिइरहेको अवस्था छ ।’
पपुलिजमले देश र समाजमा निम्त्याउने खतराहरूको विश्लेषण गर्दै ओलीले अहिले अवतारी नायक जन्मिएर जादूमयी समाधान हुन्छ भन्ने भ्रमको तुवाँलो फैल्याउने काम भइरहेको पनि उल्लेख गरेका छन् । ‘कुनै दिन कुनै अवतारी’ नायकको जन्म हुन्छ र तिनीहरूले हेर्दाहेर्दै समस्याको जादुमयी समाधान गरिदिन्छन् भन्ने भ्रम तुवाँलो फैलाइँदैछ,’ उनले भनेका छन् ।
जनतालाई भ्रममुक्त बनाउने महत्वपूर्ण काम नै अहिलेको मुख्य कार्यभार भएको ओलीले औँल्याएका छन् । ‘पपुलिजमले मुलुकको स्थायित्व, लोकतान्त्रिक प्रणाली र जनताको भावनामा खेलबाड गर्दै कमजोर बनाउँछ, समाजमा सामूहिक निराशा सिर्जना गर्छ र पपुलिजम सामाजिक असन्तुष्टि, अराजकता र त्यसपछि विध्वंश । यही हो सिलसिला ! यसले थप समस्या जन्माउँदै जान्छ,’ उनले भने, ‘त्यसैले यतिवेला भदौ २४ को विध्वंशको जगमा खडा भएको, लोकतन्त्र र संविधानलाई कमजोर गर्न उद्यत र विभिन्न सपना बेच्दै एकत्रित हुन खोजिरहेका पपुलिस्ट र पथभ्रष्ट तत्वबाट जनतालाई भ्रममुक्त गर्नैपर्छ ।’
मुलुकमा लोकतन्त्र र संविधान संकटमा रहेको औंल्याउँदै उनले राष्ट्रिय एकता कमजोर हुँदै जाँदा बाह्य चलखेलको जोखिम बढेको र राष्ट्रिय हितको रक्षामा नयाँ चुनौती थपिएको पनि बताए । मुलुकमा केही पनि भएन भनेर जबर्जस्त सिर्जना गरिएको नकारात्मक भाष्य र युवाहरूमा निराशा र अन्योलले समाजमा भ्रम र द्विविधा रहेकाले त्यसलाई सम्बोधन गर्नुपर्नेमा जोड दिँदै ओलीले सबै लोकतान्त्रिक शक्तिलाई सहकार्यको आह्वान पनि गरे ।
बैठकका पाँच एजेन्डा
एमालेको केन्द्रीय कमिटी बैठकमा पाँच एजेन्डा प्रस्तुत भएका छन् । महासचिव शंकर पोखरेलका अनुसार बैठममा अध्यक्षको सम्बोधन, पार्टी नियमावलीमा संशोधन, राष्ट्रिय महाधिवेशनमा भएको आम्दानी–खर्चको जानकारी, महाधिवेशनयता दुईवटा सचिवालय बैठकका निर्णय अनुमोदन, महाधिवेशनबाट निर्वाचित पदाधिकारी र केन्द्रीय सदस्यहरूलाई प्रमाणपत्र वितरण र समसामायिक प्रस्ताव बैठकमा छलफलका लागि प्रस्तुत भएको छ । बैठकमा अध्यक्ष ओलीले राजनीतिक प्रतिवेदन छलफलका लागि प्रस्तुत गरेका छन् ।
