राष्ट्रिय सभा निर्वाचन : लुम्बिनीमा जनमोर्चाद्वारा उम्मेदवारी दर्ता

आगामी माघ ११ गते हुने राष्ट्रिय सभा सदस्य निर्वाचनका लागि लुम्बिनी प्रदेशबाट राष्ट्रिय जनमोर्चाले उम्मेदवारी दर्ता गरेको छ। प्युठानका बोमबहादुर खत्री र पदमा पण्डितले उम्मेदवारी दर्ता गराएका हुन्।

प्युठानको मल्लरानी गाउँपालिका– २ निवासी खत्रीले ‘अन्य’ र प्युठान नगरपालिका– ८ निवासी पदमा पण्डितले ‘महिला’ क्लस्टरमा उम्मेदवारी दर्ता गराएका हुन्।

खत्रीको प्रस्तावकमा मल्लरानी गाउँपालिका अध्यक्ष कृष्णबहादुर खड्का र समर्थकमा ऐरावती गाउँपालिका उपाध्यक्ष कृष्णप्रसाद श्रेष्ठ छन् भने पण्डितको प्रस्तावकमा भूमिकास्थान नगरपालिका प्रमुख झबिलाल थापा र समर्थकमा स्वर्गद्वारी नगरपालिका उपप्रमुख मीनराज राना मगर छन्।

लुम्बिनीमा तीन सिटका लागि हुन लागेको निर्वाचनमा कांग्रेसले दाङका वासुदेव जंगली, एमालेले गुल्मीकी रामकुमारी झाँक्री र नेपाली कम्युनिस्ट पार्टीले पाल्पाका सोमनाथ पाण्डेलाई उम्मेदवार बनाएका छन्।