राष्ट्रिय स्वतन्त्र पार्टी (रास्वपा)ले २१ फागुनमा हुने प्रतिनिधिसभा सदस्य निर्वाचनमा प्रत्यक्षतर्फको उम्मेदवारका लागि आवेदन दिने समय चार दिन थपेको छ । मंगलबार बसेको केन्द्रीय सचिवालय बैठकले २६ पुससम्म समय थपेको प्रवक्ता मनीष झाले बताए । उनका अनुसार २२ पुस बेलुकासम्म प्रत्यक्षतर्फ उम्मेदवार बन्न तीन सयभन्दा बढीको आवेदन प्राप्त भएको छ ।
रास्वपाले २१ मंसिरमा प्रत्यक्षतर्फ उम्मेदवार बन्न चाहनेलाई २५ हजार रुपैयाँ तिरेर अनलाइन आवेदन दिन आह्वान गरेको थियो । मंगलबारसम्म समय तोकिएकोमा एकता प्रक्रियाबाट आएकालाई पनि समेट्न चार दिन थपिएको हो । उम्मेदवारका लागि सार्वजनिक आह्वान गरेको रास्वपाले प्राइमरी इलेक्सन, लिडरसिप एकेडेमी र पोलिटिकल प्रोक्जिमिटी चरणबाट छनोट गर्दै आएको छ । उम्मेदवार चयन गर्ने प्रक्रियामा ५० प्रतिशत मतभार प्राइमरी इलेक्सन, १० प्रतिशत प्रदेश तहबाट दिइने मतभार र बाँकी ४० अंक केन्द्रीय सचिवालयले कार्यसम्पादन मूल्यांकनका आधारमा दिने गरिन्छ ।
यसअघि समानुपातिकतर्फ उम्मेदवार बन्न रास्वपामा ५० हजार रुपैयाँ तिरेर ४१८ जनाले आवेदन थिए । जसमध्ये योग्य ३८५ आवेदकले छनोट प्रक्रियामा भाग लिएका थिए । तर, यहीबिचमा बालेन र कुलमान समूहसँग एकता गरेर उनीहरूलाई पनि समावेश गर्नुपर्दा छनोट प्रक्रिया पार गरेका सबैजना उम्मेदवार बन्न पाएनन् ।
प्रत्यक्षतर्फ उम्मेदवार छान्न उपसमिति
रास्वपाले प्रत्यक्षतर्फ उम्मेदवार छान्न १९ पुसमै उपसमिति गठन गरिसकेको छ । चुनावमा योग्य उम्मेदवार छनोटको प्रत्याभूतिका लागि पार्टी उपसभापति डा. स्वर्णिम वाग्लेको संयोजकत्वमा उम्मेदवार सिफारिस उपसमिति गठन गरिएको प्रवक्ता झाले बताए । उनका अनुसार उपसमितिलाई योग्य उम्मेदवार एवं छनोट प्रक्रियासमेतको सिफारिस गर्ने जिम्मेवारी दिइएको छ । उपसमितिको सदस्यहरू पार्टी सचिवालयले मनोनयन गर्नेछ । ६ माघमा तोकिएको उम्मेदवारी दाखिलाको अघिल्लो दिनसम्म उपसमितिले उम्मेदवार टुंग्याउनेछ । निर्वाचनको तयारीअन्तर्गत रास्वपाले निर्वाचन परिचालन समिति गठन, समानुपातिक उम्मेदवारको परिचालन कार्यविधि, निर्माण, निर्वाचन स्रोत व्यवस्थापन कार्यविधि निर्माण र स्थानीय तह उम्मेदवार क्लब गठनको गृहकार्य गरिरहेको छ ।
पाँच केन्द्रीय सदस्यले लिए शपथ
बालेन समूहबाट केन्द्रीय सदस्य बनेका २६ मध्ये पाँचजनाले सभापति रवि लामिछानेबाट पद तथा गोपनीयताको शपथ लिएका छन् । ‘विभिन्न कारण अस्ति उपस्थित हुन नसकेका केन्द्रीय सदस्यहरूको शपथग्रहण केन्द्रीय कार्यालय वनस्थलीमा भएको छ । पार्टी सभापति रवि लामिछानेले शपथग्रहण गराउनुभयो,’ प्रवक्ता झाले भने । १९ पुसमा केन्द्रीय सदस्य मनोनीत भएका रामकुमार ढुंगाना, सरिता ज्ञवाली, लक्ष्मी बर्देवा, शिवशंकर यादव र मधुसूदन ढकालले शपथ लिएका हुन् ।
