राष्ट्रिय स्वतन्त्र पार्टी (रास्वपा)को समानुपातिकतर्फको बन्दसूचीमा रहेकी गायिका तथा चिकित्सक डा. त्रिशला गुरुङले प्रतिनिधिसभा निर्वाचनको उम्मेदवारीबाट पछि हट्ने घोषणा गरेकी छिन् । आगामी फागुन २१ गते हुने निर्वाचनका लागि उनी उज्यालो नेपाल पार्टीको कोटाबाट बन्दसूचीमा समावेश थिइन् ।
सामाजिक सञ्जाल फेसबुकमार्फत सार्वजनिक गरिएको वक्तव्यमा डा. गुरुङले आफूलाई समानुपातिक उम्मेदवारका रूपमा सिफारिस गरिनु सम्मानको विषय भएको उल्लेख गरेकी छिन् । तर, गहिरो आत्मसमीक्षापश्चात् राजनीतिक प्रतिस्पर्धामा नजाने निर्णय गरेको स्पष्ट पारेकी छिन् ।
उनका अनुसार यो कदम कुनै असहमति वा अस्वीकारका कारण होइन । बरु चिकित्सा र कला क्षेत्रमा आफ्नो पेसागत भूमिकालाई निरन्तरता दिँदै दीर्घकालीन सामाजिक योगदानमा केन्द्रित रहने चाहनाले यस्तो निर्णय लिएको उनले बताएकी छिन् । राजनीतिबाहिर रहेर नागरिक समाज र समुदायसँग स्वतन्त्र रूपमा काम गर्न सकिने विश्वास उनको भनाइ छ ।
डा. गुरुङले पार्टी नेतृत्वले आफूप्रति देखाएको भरोसा, सम्मान र सहयोगप्रति कृतज्ञता व्यक्त गर्दै भविष्यमा पनि समाज र स्वास्थ्य क्षेत्रका मुद्दामा सक्रिय रहने प्रतिबद्धता जनाएकी छिन् । औपचारिक राजनीतिक पदमा नरहे पनि सामाजिक आवाजको रूपमा निरन्तर सक्रिय रहने उनको धारणा छ ।
उनले रास्वपाको आगामी राजनीतिक यात्राको सफलताको कामना गर्दै लोकतान्त्रिक अभ्यास र समावेशी प्रतिनिधित्व अझ सुदृढ बनोस् भन्ने शुभेच्छा पनि व्यक्त गरेकी छिन्।
