आगामी फागुन २१ गते हुने प्रतिनिधिसभा निर्वाचनका लागि नेकपा (एमाले) उदयपुरले समानुपातिकतर्फ १५ जना उम्मेदवारको नाम सिफारिस गरेको छ । प्रतिनिधिसभातर्फ दुई निर्वाचन क्षेत्र रहेको उदयपुरमा एमालेले हाल समानुपातिकतर्फ मात्र उम्मेदवारी सिफारिस गरेको हो ।
एमाले जिल्ला कमिटी उदयपुरका उपसचिव हेम खड्काका अनुसार मञ्जुकुमारी चौधरी, अम्बिका थापा, कला घले, पदमबहादुर राई, सिर्जना तामाङ, कान्ता राई, बेनीबहादुर रम्तेल, भीमकुमारी राउत रहेका छन् । यसैगरी, खड्गबहादुर परियार, नारदराज थापा, राजन शाही, माया भण्डारी, सुरेश तामाङ, अनन्त दनुवार र चन्द्रनारायण चौधरी समानुपातिकतर्फ सिफारिस गरिएको खड्काले जानकारी दिए ।
खड्काका अनुसार सिफारिस सूचीलाई जिल्ला कमिटीको निर्णयअनुसार कोशी प्रदेश कमिटीमा पठाइएको छ। उनले भने, ‘सबै क्षेत्र, भूगोल र समुदायको समावेशी प्रतिनिधित्व, साथै पार्टीप्रतिको योगदान र संगठनात्मक अनुभवलाई ध्यानमा राखेर उम्मेदवार सिफारिस गरिएको हो ।’
एमाले उदयपुरका अध्यक्ष भागवत राउतले पार्टी केन्द्रले समानुपातिकका लागि मात्र मागेकाेले सिफारिस गरेको जानकारी दिए । उनले भने, ‘आगामी माघ २० गतेभित्र प्रत्यक्षतर्फको पठाउनुपर्ने भएको छ । त्यसको तयारीमा जुटेका छौँ । राष्ट्रिय सभातर्फ पार्टीले उम्मेदवारको सिफारिस मागेको छैन ।’
