लुम्बिनी बौद्ध विश्वविद्यालयमा हिमालयन रिसर्च इन्ष्टिच्युट स्थापना भएको छ।चीनको नानकाई विश्वविद्यालय, मकाउ इन्टरनेशनल थिंकट्यांक सहकार्यमा हिमालयन रिसर्च इन्ष्टिच्युट स्थापना भएको हो । हिमालयन रिसर्च इन्ष्टिच्युट स्थापना गर्ने सम्बन्धी त्रिपक्षीय सहकार्य सम्झौतामा २०८२ मंसिर २५ गते लुम्बिनी बौद्ध विश्वविद्यालयका उपकुलपति प्रा.डा.सुवर्णलाल बज्राचार्य र मकाउ इन्टरनेशनल थिंकट्यांक अध्यक्ष प्राध्यापक स्वी हाओले हस्ताक्षर गरेका छन् ।
इन्ष्टिच्युटमार्फत दुई देशबीचको सम्बन्न्ध, बौद्ध दर्शन, कला, संस्कृतिका विषयमा अध्ययन अनुसन्धान हुनेछ। सो अवसरमा बोल्दै लुम्बिनी बौद्ध विश्वविद्यालयका उपकुलपति बज्राचार्यले हिमाली बौद्ध परम्परा, पुरातत्वको अध्ययन अनुसन्धान जरुरी रहेको भन्दै विश्वविद्यालयबाट त्यसका लागि इन्ष्टिच्युट स्थापना गरिएको बताए ।
नानकाई विश्वविद्यालय, स्कुल अफ फिलोसोफीका प्राध्यापक चाओ वनले दुई देशबीचमा रहेको हिमालय बौद्ध संस्कृति, कला साहित्यको अनुसन्धानले दुई देशको सम्बन्धलाई अझ सुमधुर पार्ने बताए। उनले इन्ष्टिच्युटमार्फत संयुक्तमा रुपमा अध्ययन अनुसन्धान र प्रकाशनहरु गरिने बताए। मकाउ इन्टरनेशनल थिंकट्यांक अध्यक्ष प्राध्यापक स्वी हाओले इन्ष्टिच्युटमार्फत अनुसन्धान क्रियाकलाप गर्नका लागि विश्वविद्यालयसँग सहकार्य गर्न पाएको खुसी व्यक्त गरे ।
उनले हिमालयन पेरिफेरिको अध्ययन अनुसन्धानले चीन नेपाल सम्बन्धलाई अझ बलियो बनाउने र अध्येताहरुमा ज्ञान प्रवद्र्धन हुने बताए । लुम्बिनी बौद्ध विश्वविद्यालय अनुसन्धान केन्द्रका निर्देशक प्रा.डा. गितु गिरीले हिमालय बौद्ध संस्कृतिको अध्ययन अनुसन्धानका लागि इन्ष्टिच्युट स्थापना महत्वपूर्ण हुने बताए । इतिहास कायम गरेका गुम्बा संस्कृतिको अध्ययनको खाँचो औल्याउदै अव विश्वविद्यालयले इन्ष्टिच्युटमार्फत संयुक्त रुपमा अनुसन्धान र प्रकाशन गर्ने बताए ।
