पोखरा अन्तर्राष्ट्रिय विमानस्थल निर्माणको प्रक्रियामा अनियमितता गरेको गरेको आरोपमा अख्तियार दुरुपयोग अनुसन्धान आयोगले आइतबार दायर गरेको भ्रष्टाचार मुद्दामा ५५ जना व्यक्तिलाई प्रतिवादी कायम गरेको छ । तिनमा ६ जना बहालवाला कर्मचारी छन् ।
अख्तियारले मुद्दा दायर गर्दा बनाएका प्रतिवादीमा नागरिक उड्डयन प्राधिकरणका महानिर्देशकसहित त्रिभुवन अन्तर्राष्ट्रिय विमानस्थल र गौतमबुद्ध अन्तर्राष्ट्रिय विमानस्थलका प्रमुखसमेत छन् ।
प्राधिकरणका महानिर्देशक प्रदीप अधिकारी उपप्रबन्धक हुँदाको समयमा खरिद प्रक्रियामा जोडिएकाले मुद्दामा आरोपित छन् । गत साता अख्तियारले दायर गरेको हेलिपोर्टको मुद्दामा पनि उनी प्रमुख प्रतिवादी छन् ।
हाल त्रिभुवन अन्तर्राष्ट्रिय विमानस्थलका महाप्रबन्धक हंशराज पाण्डेयलाई पनि अख्तियारले पोखरा विमानस्थलको भ्रष्टाचार मुद्दामा प्रतिवादी बनाएको छ । उनी प्राधिकरणमा उपनिर्देशक हुँदा खरिद प्रक्रियामा जोडिएका थिए । यसैगरी हाल गौतमबुद्ध अन्तर्राष्ट्रिय विमानस्थल कार्यालयका महाप्रबन्धकको पदमा कार्यरत बाबुराम पौडेलविरुद्ध पनि अख्तियारले मुद्दा दायर गरेको छ । उनी प्राधिकरणमा निर्देशक हुँदा विमानस्थल निर्माणको खरिद प्रक्रियामा जोडिएका थिए ।
यसैगरी, हाल प्राधिकरणमा उपमहानिर्देशक रहेका प्रतापबाबु तिवारीविरुद्ध पनि मुद्दा छ । उनी निर्देशक हुँदा खरिद प्रक्रियामा संलग्न थिए । प्राधिकरणमा तत्कालीन अवस्थामा वरिष्ठ कानुन अधिकृत रहेर खरिदमा जोडिएका द्वारिकाप्रसाद भट्टराई पनि मुद्दाका प्रतिवादी छन् । उनी हाल प्राधिकरणमै प्रबन्धक पदमा कार्यरत छन् ।
यसैगरी, तत्कालीन अवस्थामा अर्थ मन्त्रालयमा शाखा अधिकृत रहेका कमलकुमार भट्टराईलाई पनि अख्तियारले मुद्दा दायर गरेको छ । उनी हाल अर्थ मन्त्रालयमै उपसचिव छन् । सबै प्रतिवादीविरुद्ध जनही आठ अर्ब ३७ करोड बिगो दाबी गरिएको छ ।
