विविध जातिका सांस्कृतिक परम्पराले नेपालको राष्ट्रिय पहिचान मजबुत भएको मुख्यमन्त्री बानियाँको विश्वास

बागमती प्रदेशका मुख्यमन्त्री इन्द्रबहादुर बानियाँले नेपालमा रहेका विविध जातजातिका सांस्कृतिक परम्पराहरूले राष्ट्रिय पहिचान मजबुत बनाउन ठुलो योगदान दिएको उल्लेख गरेका छन् । किराँत समुदायले मनाउने महत्त्वपूर्ण सांस्कृतिक पर्व उँधौली–उँभौली तथा नेवारी समुदायले मनाउने यःमरी पुन्हीको अवसरमा शुभकामना सन्देश जारी गर्दै विविधता, सहिष्णुता र सामाजिक एकताले भरिएको नेपालमा विविध समुदायको सांस्कृतिक परम्पराले राष्ट्रिय पहिचान मजबुत बनाउन ठुलो योगदान दिएको उल्लेख गरेका हुन् ।

उनका अनुसार नेपाल बहुजातीय, बहुभाषिक, बहुसांस्कृतिक र बहुधार्मिक विशेषतायुक्त मुलुक भएकाले विभिन्न समुदायका धर्म, भाषा, साहित्य र परम्पराहरूले आपसी सम्मान र सहअस्तित्वको उदाहरण प्रस्तुत गर्दै आएका छन् । किराँत समुदायले मनाउँदै आएको उँधौली–उँभौली पर्व प्रकृति पूजा, कृषि चक्र तथा सामूहिक सदभावको प्रतीक रहेको उल्लेख गर्दै मुख्यमन्त्रीले यस पर्वले समाजमा शुभकामना, सौहार्द र मानवताको सन्देश फैलाउने मुख्यमन्त्री बानियाँले विश्वास व्यक्त गरेका छन् ।

किराँत समुदायले आफ्नो मौलिक परम्परा जोगाउँदै सांस्कृतिक पहिचान संरक्षणमा गरेको योगदानको प्रशंसा गर्दै उनले प्रदेश सरकार यस समुदायको भाषा, साहित्य र सांस्कृतिक विकासका लागि आवश्यक सहयोग गर्न प्रतिबद्ध रहेको स्पष्ट पारेका छन् । उनले किराँत समुदायले प्रदेशको सामाजिक सदभाव, लोकतान्त्रिक मूल्य तथा समावेशी समाज निर्माणमा गरेका योगदान उल्लेखनीय रहेको सन्देशमा उल्लेख गरेका छन् ।

यस्तै, नेवारी समुदायको यःमरी पुन्हीको अवसरमा उनले देशभरको सामाजिक सदभाव, राष्ट्रियता र गणतान्त्रिक मूल्य–मान्यता अझ सुदृढ हुने अपेक्षा व्यक्त गर्दै सबैमा एकता, सहिष्णुता र आपसी सदभावको भावना फैलियोस् भन्ने शुभकामना व्यक्त गरेका छन् ।