स्तरोन्नतिको हुँदै गरेको मुग्लिङ–पोखरा सडक सुधार आयोजनाअन्तर्गत पश्चिम खण्डमा ११ मंसिरसम्म दैनिक चार घण्टा बाटो पूर्ण-आंशिक बन्द हुने भएको छ।
आयोजनाको पश्चिम खण्डका प्रमुख कृष्णबहादुर कुँवरका अनुसार पोखरा–२६, विजयपुरस्थित खेलामा निर्माण हुँदै गरेको दुई लेनको पुलमा गर्डरहरू राख्ने कामका लागि ६ देखि ११ मंसिरसम्म दैनिक चार घण्टा सडक पूर्ण/आंशिक बन्द हुने भएको हो।
शनिबारदेखि दैनिक बिहान दुई र दिउँसो दुई घण्टा पोखरादेखि विजयपुर हुँदै तालचोक जाने र सोही रुट हुँदै आउने सवारीसाधनलाई पूर्ण-आंशिक रूपमा बन्द गरी निर्माण गर्नुपर्ने भएको कुँवरले बताए।
बन्द हुने मिति र समय
सडक शनिबार अर्थात् ६ मंसिरदेखि ११ मंसिरसम्म दैनिक बिहान ६ देखि ८ बजेसम्म र दिउँसो १२ देखि २ बजेसम्म पूर्ण-आंशिक रूपमा बन्द (अवस्था हेरी प्रत्येक ३० मिनेटमा लाइन लागेका सवारी साधनलाई क्लियर गर्न सकिने) गरी निर्माण गरिने भएको हो।
यस्ता छन् वैकल्पिक रुटहरू
पोखरादेखि विजयपुर हुँदै तालचोक जाने र सोही रूट हुँदै आउने सवारीसाधनलाई सो समय वैकल्पिक बाटो प्रयोग गर्न आयोजनाले अनुरोध गरेको छ । जसका लागि दुईपांग्रे तथा साना सवारीसाधनले अर्घौचोक वा बुढीबजार चोकबाट बेलचौतारा हुँदै चाउथे निस्कने र सोही रुट हुँदै जाने बाटो प्रयोग गर्न आयोजनाले भनेको छ।
ठुला सवारीसाधनका लागि पावरहाउस चोकदेखि बौमारा हुँदै बिरौटा जान आउन सकिने भएकाले सोहीअनुसार गर्न आयोजनाले सरोकारवाला सबैमा अनुरोध गरेको छ।
