चालू आर्थिक वर्षको पहिलो तीन महिनामा वीरगन्ज नाका हुँदै आठ अर्ब ७० करोडका विभिन्न प्रकारका सवारीसाधन नेपाल भित्रिएका छन् । सवारीसाधनको आयातबाट सात अर्ब ७७ करोड रुपैयाँ राजस्व संकलन गरिएको वीरगन्ज भन्सार कार्यालयका प्रमुख भन्सार प्रशासक विष्णुप्रसाद ज्ञवालीले जानकारी दिए ।
गत आर्थिक वर्षको सोही अवधिमा ६ अर्ब १९ करोड रुपैयाँबराबरका सवारीसाधन भित्रिएका थिए । सो अवधिमा पाँच अर्ब ९५ करोड रुपैयाँ राजस्व संकलन भएको थियो । चालू वर्षमा मात्र तीन अर्ब ४१ करोड मूल्यका २४ हजार नौ सय ३९ थान अनएसेम्बल्ड मोटरसाइकल आयात भएका छन्, जसबाट तीन अर्ब २८ करोड रुपैयाँ राजस्व संकलन भएको छ ।
त्यस्तै, जिप, कार र भ्यान वर्गका तीन सय ३० वटा सवारीसाधन ६२ करोड २४ लाख रुपैयाँको आयात भई एक अर्ब ७५ करोड रुपैयाँ राजस्व आएको छ । विद्युतीय सवारीसाधनको आयातमा पनि उल्लेख्य वृद्धि भएको छ ।
यो अवधिमा दुई सय ९९ वटा विद्युतीय जिप, कार र भ्यान ६८ करोड पाँच लाख रुपैयाँको भित्रिएका छन् । तीबाट ४५ करोड ७२ लाख रुपैयाँ राजस्व संकलन भएको छ । गत वर्षको सोही अवधिमा भने केवल ९७ वटा विद्युतीय सवारीसाधन १४ करोड ४९ लाख रुपैयाँको आयात भएका थिए ।
वीरगन्जमा पछिल्लो दुई वर्षमा सातवटा इभी (इलेक्ट्रिक भेहिकल) गाडीको नयाँ सोरुम सञ्चालनमा आएका छन् । इभीको माग देशव्यापी रूपमा बढेपछि विभिन्न कम्पनीले वीरगन्जमा सोरुम खोलेका हुन् । नेपाली बजारमा चिनियाँ, भारतीय, अमेरिकन तथा युरोपियन ब्रान्डका इभीले स्थान बनाएका छन् । अहिले बिवाइडी, जगदम्बा मोटर्स, हलमार्क मोटर्स इन्भेस्टमेन्ट, नारायणी अटोकप, नोभस बोद्रर्स, द ग्रिन र सशीला मोटर्सले सोरुम सञ्चालनमा ल्याएका छन् ।
यस्तै, महिन्द्रा र टाटा कम्पनीले पनि आफ्ना सोरुममा इभी गाडी ल्याएका छन् । वीरगन्जको बाइपास रोडमा गत वर्षमा बिवाइडीको सोरुम सञ्चालनमा आएको छ । करिब दुई वर्षअगाडि पिपरामा द ग्रिनले डाँफेको प्यासेन्जर गाडीको सोरुम ल्याएको हो ।
