मनाङ जिल्लाको ङिस्याङ गाउँपालिका– ९, तिलिचो तालको बेस क्याम्पमा अलपत्र परेका १५ जना पर्यटकको उद्धारका लागि सशस्त्र प्रहरी बलको उद्धार टोली त्यसतर्फ गएको छ ।
दुईजना चिनियाँ नागरिक र १३ जना नेपाली गरी जम्मा १५ जना पर्यटक हिमपातको कारण तिलिचो तालको बेस क्याम्पमा अलपत्र परेका छन् ।
उनीहरू अलपत्र परेको भन्ने जानकारी पाउना साथ सशस्त्र प्रहरी बल नेपाल पर्वतीय उद्धार तालिम शिक्षालय मनाङबाट सशस्त्र प्रहरी उपरीक्षक टोपबहादुर डाँगीको कमान्डमा विपत् व्यवस्थापन तालिमप्राप्त सुरक्षा फौज र मेडिकलसहितको टोली उनीहरूको उद्धारका लागि खटिएको छ । सो ताल पर्वतीय उद्धार तालिम शिक्षालय मनाङबाट पैदल जानुपर्ने भएकोले उद्धारमा केही समय लाग्नेछ । अलपत्र परेका पर्यटकहरूको अवस्था भने अहिलेसम्म सामान्य रहेको बताइएको छ ।
