एमालेले अहिलेको सरकार चुनावको दिशामै नरहेको विश्लेषण गर्दै संसद् पुनर्स्थापनाका लागि कांग्रेससहित राजनीतिक दलहरूसँग वार्तामा रहेको जानकारी गराएको छ । सरकार चुनावी वातावरण बनाउने काममा नलागेको बरु मुलुकलाई तनाव र मुठभेडतिर लैजान उद्यत रहेको एमालेको आरोप छ ।
‘निर्वाचनको आत्मा भनेको भयरहित वातावरण, निष्पक्षता, स्वच्छता र हरेक उम्मेदवार, दलले निर्भयतापूर्वक मतदातासामु आफ्ना कुरा लैजान पाउने वातावरण हो । त्यो वातावरण निर्माणमा सरकार लागेकै छैन । सरकार चुनाव गर्ने होइन, राजनीतिक अस्वस्थतातिर लागेको छ,’ ज्ञवालीले भने, ‘कुनै पनि लोकतान्त्रिक शक्ति निष्पक्ष र भयरहित वातावरणको निर्वाचनबाट पन्छिँदैनन् । तर, जे घटनाक्रम भए, त्यो सामान्यतया निर्वाचन गरेर लोकतन्त्र पुनस्र्थापित गर्ने उद्देश्यले भएका होइनन् भन्ने गम्भीर आशंका छ ।’
एमालेले अन्तरिम सरकार चुनाव गराउनेभन्दा पनि राजनीतिक दलहरूलाई निषेध गरेर देशलाई मुठभेडको दिशामा लैजान प्रयासरत रहेको विश्लेषण गरेको छ । ‘एउटा विशेष स्थितिमा सुशीला कार्की प्रधानमन्त्री बन्नुभो, तर त्यसपछि सरकारले गरिरहेको काम र क्रियाकलापप्रति हाम्रो गम्भीर आपत्ति छ । मुलुकको विभाजित मनस्थिति जोडेर राष्ट्रिय एकता कायम गर्न सबै दललाई साथमा लिएर अघि बढ्नुपथ्र्यो । तर, साथ लिने होइन सरकार निषेधको बाटोबाट अगाडि बढिरहेको छ,’ बैठकपछि ज्ञवालीले भने ।
उनले सरकारका क्रियाकलापले चुनावभन्दा मुठभेड निम्त्याउने एमालेको टिप्पणी छ । ‘सरकार बनाउनेहरू हिंसाको भाषा बोलिरहेका छन् । राजनीतिक नेताहरूमाथि भौतिक आक्रमणको धम्की दिइएको छ । एकातिर गृहमन्त्रीको दबाबमा प्रहरीलाई कुटीकुटी हत्या गर्ने र हतियार लुट्नेलाई सजिलै छाडिदिने काम भएको छ,’ ज्ञवालीले भने, ‘अर्कोतिर शान्तिपूर्ण प्रदर्शन गर्ने दलहरूलाई रोक्ने, नेताहरूलाई स्थान हद तोक्ने काम भएको छ । यसले वर्तमान सरकार निर्वाचन गराउने बाटोमा होइन, मुलुकलाई अनावश्यक तिक्तता, तनाव र मुठभेडतिर लैजान उद्यत छ भन्ने देखिन्छ ।’
