पूर्वी नेपालको हिमाली जिल्ला ताप्लेजुङ प्राकृतिक सौन्दर्यले भरिएको ठाउँ हो । यहाँबाटै विश्वकै तेस्रो अग्लो हिमाल कञ्चनजंघा हेर्न पाइन्छ । प्रसिद्ध धार्मिकस्थल पाथीभरा देवीको मन्दिर पनि यही जिल्लामा पर्छ । यति महत्वपूर्ण पर्यटकीय र धार्मिक गन्तव्य रहेको ताप्लेजुङ पुग्ने सजिलो माध्यम भनेको सुकेटार विमानस्थल हो । तर, यो विमानस्थल वर्षौँदेखि चले पनि नचलेबराबरकै अवस्थामा छ । पछिल्लो समय त दुई महिनादेखि जहाज आएको छैन ।
०३३ सालमा निर्माण गरिएको सुकेटार विमानस्थलबाट केही समय नियमित उडान भए पनि पछिल्ला वर्षहरूमा यसको सेवा अवरुद्धजस्तै भएको छ । जहिल्यै मौसम नखुलेको भनेर जहाज आउँदैन, कहिले जहाज नपाएर सेवा रोकिन्छ । पछिल्लो समय नेपाल वायुसेवा निगमका जहाज बिग्रिएपछि मर्मतका लागि पठाइयो र त्यसयता सुकेटारमा नियमित उडान भएको छैन । जेठको १५ देखि साउन, भदौ तथा असोजको पहिलो सातासम्म बर्सातकै कारण जहाज अवतरण गर्न सक्दैन । जब मौसम सफा हुन्छ, तब जहाज नै हुँदैन ।
जहाजको आसमा स्थानीय बासिन्दाले पनि दुःख मात्रै पाउने गरेका छन् । दुर्गम गाउँबाट बिरामी बोक्दै विमानस्थलसम्म आइपुग्दा पनि जहाज नउडेपछि उनीहरू सडकमार्गको आश्रय लिन बाध्य हुन्छन् । तर, ताप्लेजुङदेखि धरान वा काठमाडौं पुग्न घण्टौँको जोखिमपूर्ण यात्रा गर्नुपर्छ । केही बिरामीले गन्तव्यमै पुग्न नपाई बाटोमै ज्यानसमेत गुमाउँछन् ।
पर्यटकका लागि पनि सुकेटारमा उडान नहुँदा ठुलो समस्या भएको स्थानीयहरू बताउँछन् ।कञ्चनजंघा आधारशिविर ट्रेकमा जान चाहने आन्तरिक र विदेशी पर्यटकले पटक–पटक यात्रा स्थगन गर्नुपरेको छ । पाथीभरा दर्शन गर्न आउने भक्तजन पनि जहाज नउड्दा असहज बनेका छन् । यसले ताप्लेजुङको पर्यटन व्यवसायलाई समेत नराम्रो असर पारेको छ ।
