विश्व आदिवासी दिवस नवलपुरमा पनि अन्तर्क्रिया गरी मनाइने

बुधबार, २१ साउन, २०८२
डिजिटल संस्करण

नेपाल आदिवासी जनजाति महासंघ जिल्ला समन्वय परिषद् (नेफिन) नवलपुरले ३१औँ विश्व आदिवासी नवलपुरमा पनि विविध कार्यक्रम गरी मनाउने भएको छ । 

नेपाल आदिवासी जनजाति महासंघ नवलपुरका जिल्ला अध्यक्ष रामकुमार श्रेष्ठको अध्यक्षतामा कावासोतीमा बसेको जिल्ला कार्यसमितिको बैठकले यस वर्षको विश्वआदिवासी दिवस ‘प्राकृतिक स्राेत, जल, जमिन र जंगलमाथि आदिवासी जनजातिको अधिकार सुनिश्चित गर, संयुक्त राष्ट्र संघका एजेन्सी संस्था युएन ड्रिप र आइएलओ १६९ सम्बन्धी सर्वाेच्च अदालतको निर्देशनात्मक आदेश कार्यान्वयन गर’ भन्ने मूल नारासहित मनाउने निर्णय गरिएको जानकारी दिए । 

कार्यक्रम कावासोती– ३ मा रहेको मगर गुम्बा हलमा साउन २४ गते शनिबार हुने भएको छ । उक्त दिन यहाँ रहेका संघीय, प्रदेश तथा स्थानीय तहका जनप्रतिनिधिहरू र आदिवासी जनजातिका अगुवाहरूबिच प्राकृतिक स्राेत, जल, जमिन र जंगलमाथि आदिवासी जनजातिको अधिकार र स्थानीय तहमा आदिवासी जनजातिको मातृभाषा कार्यान्वयनको विषयमा अन्तर्क्रिया गरिने भएको छ । 

कार्यक्रममा आदिवासी जनजातिका जातीय घटकहरूको पनि सक्रिय सहभागिता रहने जनाएको छ भने त्यसैगरी नेपाल आदिवासी जनजाति महासंघ पालिकास्तरीय समितिलाई पनि आ–आफ्नो ढंगले विश्व आदिवासी दिवस मनाउने आग्रह गरिएको अध्यक्ष रामकुमार श्रेष्ठले बताए ।

सुझावित समाचार