मेयर बालेन जनकपुर फिस हाउसमा, भन्छन्– तावा फिस खाँदा जनकपुरको याद आयो

काठमाडौं महानगरपालिकाका मेयर बालेन शाहले नक्साल गैरीधारास्थित मिथिला थाली परिसरमा रहेको जनकपुर फिस हाउसमा पुगेर जनकपुरे माछाको स्वाद लिएका छन् । 

मास्टरसेफ सन्तोष साह र उनका दाजु दिलिप साहले सञ्चालन गरिरहेको जनकपुर फिस हाउसमा पुगेर शनिबार साँझ मेयर शाहले माछाका परिकारको स्वाद लिएका हुन् ।

‘यहाँको माछाका परिकारमा तराईमा माछा खाएको स्वाद आयो, काठमाडौँमा जनकपुरे माछाको परिकार खान पाउँदा खुसी लाग्यो,’ मेयर शाहले भने । मेयर शाह पत्नी सबिना काफ्लेसहित मिथिला थाली पुगेका थिए ।

मास्टर सेफ साह काठमाडौं महानगरका फूड सेफ्टीका कन्सलट्यान्ट पनि हुन् । साहले काठमाडौंको गैरीधारा, झम्सीखेल र गौशालामा मिथिला थाली रेष्टुरेन्ट सञ्चालन गरिरहेका छन् । गैरीधारामा जनकपुर फिस हाउस पनि सञ्चालनमा छ । साथै जनकपुरमा आवासको सुविधासहित मिथिला थाली सञ्चालन गरिरहेका छन् । 

पछिल्लो समय जनकपुरे माछाका विभिन्न परिकारका लागि मानिसहरू गैरीधारास्थित जनकपुर फिस हाउसमा पुग्ने गरेका छन् । जनकपुर माछाका परिकारका लागि चर्चित गन्तव्य हो । जनकपुरमा पाइने माछाका परिकार काठमाडौँबासीलाई चखाउने उद्देश्यले केही समयअघि साहले जनकपुर फिस हाउस सञ्चालनमा ल्याएका हुन् ।