कैलाली भन्सार कार्यालयका प्रमुख प्रमुख भन्सार अधिकृत अनन्तप्रसाद तिम्सिनामाथि कुटपिट घटनामा प्रहरीले धनगढी उपमहानगरपालिकाका चारजना नगर प्रहरीलाई पक्राउ गरेको छ ।
नगर प्रहरी प्रमुख नगर प्रहरी निरीक्षक लक्ष्मणसिंह धामी, सवारीचालक रतनबहादुर मल्ल, नगर प्रहरी हवल्दार मणिदत्त भट्ट र नगर प्रहरी जवान जितेन्द्रसिंह धामीलाई पक्राउ गरिएको जिल्ला प्रहरी कार्यालय कैलालीले जनाएको छ ।
जिल्ला प्रहरी कार्यालयका प्रवक्ता प्रहरी नायब उपरीक्षक राजकुमार सिंहले कुटपिटमा संलग्न चारजना नगर प्रहरीलाई पक्राउ गरेर कारबाही प्रक्रिया अगाडि बढाइएको बताएका छन् । प्रहरीका अनुसार धामीलाई कञ्चनपुरबाट र अन्य तीनजनालाई धनगढीबाट पक्राउ गरिएको हो । भन्सार प्रमुख तिम्सिनाले आफूमाथि कुटपिट गरेको भन्दै नगर प्रहरी प्रमुख धामीविरुद्ध आइतबार प्रहरीमा किटानी जाहेरी दिएका थिए ।
धामीसहितको टोलीले शनिबार राति भन्सार कार्यालय परिसरमा भन्सार कार्यालय प्रमुख तिम्सिनालाई कुटपिट गरेका थिए । भन्सार कार्यालयबाहिर ब्यारियलमा नगर प्रहरी र भन्सार प्रमुखबिच विवाद भएको थियो । कार्यालय परिसरमा तिम्सिनामाथि कुटपिट भएको सिसिटिभीको भिडियो सार्वजनिक भएको छ ।
कुटपिटमा संलग्न नगर प्रहरी निरीक्षक धामीलाई धनगढी उपमहानगरले पनि कारबाही प्रक्रिया अगाडि बढाएको छ । उपमहानगरले धामीलाई क्षेत्राधिकारबाहिर गएर अनधिकृत काम गरेको भन्दै आइतबार नै स्पष्टीकरण सोध्दै २४ घण्टाभित्र जवाफ दिन भनेको छ ।
शनिबार राति एउटा स्कार्पियोले धनगढी–अत्तरिया ६ लेन सडकको मिडियनमा लगाएको वाल भत्काएको सूचनापछि नगर प्रहरी प्रमुख धामीको टोली उक्त गाडीको खोजीका लागि भन्सारको बेरियलसम्म पुगेको थियो । सो क्रममा भन्सार प्रमुख तिम्सिना र नगर प्रहरी प्रमुख धामीबिच विवाद भएको हो ।
