राष्ट्रिय सभा सदस्यहरूले सिराहामा महायज्ञ गर्ने नाममा दलितको घरमा डोजर लगाएर भत्काउनेलाई कारबाही गर्न माग गरेका छन् । राष्ट्रिय सभाको आइतबार बसेको बैठकमा सांसदहरूले घटनाबारे संसदीय छानबिन गरी दोषीलाई कडा कारबाही गर्न माग गरेका हुन् । कांग्रेस सांसद विष्णुदेवी पुडासैनीले संविधानमा उल्लेख हक अधिकारविपरीत महायज्ञको नाममा दलितको घरमा डोजर लगाउनु आपराधिक कार्य भन्दै घटनामा संलग्नलाई कारबाहीको माग गरिन् ।
माओवादी सांसद भुवनबहादुर सुनारले संसदीय छानबिनको माग गरे । उच्चस्तरीय संसदीय छानबिन समिति गठन गरेर घटनाको निष्पक्ष छानबिन गरी न्याय दिनुपर्ने उनको भनाइ छ । एकीकृत समाजवादीका घनश्याम रिजालले घटनामा संलग्न सबैलाई कारबाहीको माग गरे ।
‘दलित बसेको माटो अपवित्र हुन्छ भन्दै घरभित्र रहेको माटोसमेत खनेर फालिएको छ,’ उनले भने, ‘यसबाट झन्डै ६० लाख दलित समुदायलाई अपमानित गरिएको छ । यो संविधान र कानुनविपरीतको काम हो ।’ निर्वाचित जनप्रतिनिधिबाटै जातीय विभेदजस्तो जघन्य अपराध हुनुले नेपाली समाजको चेतनाको धरातल उदांगो पारिदिएको बताए । उनले घटनामा संलग्न गाउँपालिका अध्यक्ष शिवजी यादवलाई प्रहरीले नियन्त्रणमा लिए पनि पीडित परिवारले अझै असुरक्षित महसुस गरिरहेको देखिएकाले सुरक्षाको प्रत्याभूति गराउन सरकारको ध्यानाकर्षण पनि गराए ।
समाजवादीकै सांसद मदनकुमारी शाह (गरिमा)ले जातीय छुवाछुतमुक्त मुलुक घोषणा भएको १८ वर्ष हुँदासमेत यस्ता घटना हुनु दुःखद भन्दै घटनाको निष्पक्ष छानबिनको माग गरिन् । अन्य सांसदले पनि घटनामा संलग्न जोसुकै भए पनि नियन्त्रणमा लिन र दलितमाथिको विभेद अन्त्यका लागि सरकारको ध्यानाकर्षण गराएका थिए ।
