कुशल भुर्तेलले अलराउन्ड प्रदर्शन गरेपछि नेपाल पुलिस क्लबले प्रधानमन्त्री (पिएम) कप क्रिकेट प्रतियोगितामा कोशी प्रदेशलाई १५४ रनको फराकिलो अन्तरले पराजित गरेको छ । कुशलले ब्याटिङमा ६५ रन तथा बलिङमा दुई विकेट लिएका थिए । लगातार दुई जित निकालेको पुलिस तालिकाको दोस्रो स्थानमा छ । त्रिभुवन आर्मीले पनि दुई जित हात पारेको छ । रनरेटका आधारमा आर्मी शीर्ष स्थानमा छ । लगातार तीन खेल हारेको कोशी पुछारमा छ । बागमती प्रदेशले दुई खेल गुमाएको छ ।
भैरहवाको मैदानमा बुधबार पहिलो ब्याटिङ गरेको पुलिसले ५० ओभरमा आठ विकेट गुमाएर २८८ रन बनाएको थियो । प्रत्युत्तरमा कोशीले ३६.२ ओभरमा सबै विकेटको क्षतिमा १३४ रन मात्र जोडेको थियो । कोशीविरुद्ध करण केसीले आठ ओभरमा २९ रन दिँदै तीन विकेट लिए । ललित राजवंशीले सात ओभरमा १० रन खर्चंदै दुई विकेट लिए । खेलकै म्यान अफ दी म्याच कुशलले १.२ ओभरमा एक मेडन राखी दुई विकेट हात पारे ।
नाम चलेका ब्याट्सम्यान टिके
राष्ट्रिय खेलाडीले भरिएको पुलिसले पहिलो ब्याटिङ गरेको थियो । अनुभवी खेलाडीले टोलीलाई ब्याटिङमा निराश बनाएनन् । ओपनर अर्जुन साउद र कुशलबिच पहिलो विकेटका लागि १३.१ ओभरमा ६९ रनको साझेदारी भयो । अर्जुनले ४८ बलमा चार चौका र एक छक्का प्रहार गरी ३८ रन जोडेका थिए । पुलिसले चौथो विकेटका रूपमा कुशललाई गुमाएको थियो । उनले कप्तान दीपेन्द्रसिंह ऐरीसँग चौथो विकेटका लागि ५६ रन जोडेका थिए । कुशलले ७८ बलमा समान दुई चौका र छक्का प्रहार गरे ।
यसैगरी, कप्तान दीपेन्द्रले ३९ बलमा ३२ रन बनाए । दिलीप नाथले ६४ बलमा चार चौका र एक छक्काको सहयोगमा ६१ तथा रासिद खानले २५ बलमा पाँच
चौका र एक छक्काको मद्दतमा ३८ रनको योगदान दिए । कोशीको कमजोर ब्याटिङमा कप्तान अंकित सुवेदीले २१ तथा सूर्य थपलियाले ५२ बलमा ३३ रन बटुले । पुलिसका बलरले समग्रमा सात मेडन ओभर फ्याँकेका थिए ।
आर्मी आठ विकेटले विजयी
प्रतियोगिताअन्तर्गतको नवौँ खेलमा आर्मीले सुदूरपश्चिमलाई आठ विकेटले हराएको छ । सिद्धार्थनगर मैदानमा पहिलो ब्याटिङ गरेको सुदूरपश्चिम ४५.३ ओभरमा ११७ रनमा समेटियो । प्रत्युत्तरमा आर्मीले २३.५ ओभरमा दुई विकेटको नोक्सानीमा ११९ रन जोड्यो । आर्मीको जितमा सहाव आलमले घातक बलिङ गरेका थिए । उनले १९ रन खर्चेर सुदूरपश्चिमका चार विकेट लिए । सुदूरपश्चिमका निश्चल क्षेत्रीले १२१ बलमा ४९ रन जोडेका थिए । प्रत्युत्तरमा आर्मीका लागि सन्तोष कार्कीले ६३ बलमा १० चौकाको सहयोगमा ५५ रनको योगदान दिए । कप्तान विनोद भण्डारीले नटआउट २० रन जोड्न दुई चौका र एक छक्का प्रहार गरे ।
