नेपाल–भारत उद्योग वाणिज्य संघ (निक्की) स्थापनाको ३०औँ वर्षको अवसर पारेर संस्थापक अध्यक्ष स्व. प्रभाकर एसजेबी राणाको योगदान र व्यक्तित्व स्मरण गरिएको छ । सोमबार काठमाडौंमा आयोजित ‘प्रथम प्रभाकर एसजेबी राणा मेमोरियल लेक्चर : लिडरसिप, भिजन एन्ड लेगेसी’ नामक कार्यक्रममा बोल्ने वक्ताहरूले उनी देशकै अग्रणी र दूरदर्शी व्यवसायी मात्र नभई स्वस्थ रूपमा पनि उद्यम गर्न सम्भव रहेको मान्यता स्थापित गर्ने व्यक्तित्व रहेको बताए ।
कार्यक्रममा स्व. राणाका छोरा सिद्धार्थ राणाले राजपरिवारसँग पारिवारिक निकटता भए पनि बुबाले आफूआबद्ध कुनै पनि व्यवसायमा कहिल्यै पनि आफ्नो सम्बन्ध, निकटता र विशेषाधिकारको दुरुपयोग गरेर गलत लाभ नलिएको बताए । सिद्धार्थ व्यक्तिगत आयतर्फ सबैभन्दा बढी कर तिर्ने व्यवसायीमा पर्छन् ।
संघका अध्यक्ष सुनील केसीले प्रभाकार राणाले स्वस्थ रूपमा पनि उद्यम–व्यवसाय गर्न सम्भव रहेको मान्यता स्थापित गरेको बताए । संघकी निवर्तमान अध्यक्ष सिर्जना राणाले स्व. राणा देशकै अग्रणी तथा दूरदर्शी व्यवसायी रहेको बताइन् । प्रमुख वक्ता अन्तर्राष्ट्रिय मुद्रा कोषका कार्यकारी निर्देशक डा. कृष्णमूर्ति भेन्कटा सुब्रमन्यनले समावेशी विकास कठिन कार्य रहेको, तर भारतले पछिल्लो समयमा समावेशी रूपमा विकास हासिल गरिरहेको बताए । भारतीय दूतावासका डेपुटी चिफ अफ मिसन प्रसन्न श्रीवास्तवले नेपाल र भारतबिचको व्यापार बढोत्तरीमा संघले निर्वाह गरेको भूमिका सराहनीय रहेको बताए ।
