कर्णाली प्रदेशको हिमाली क्षेत्रमा पर्ने जुम्लामा पानी (यार्सा मिनिरल्स वाटर) उद्योग पुनः सञ्चालनमा आएको छ । ०७३ सालतिर पहिलोपटक एक करोडभन्दा बढी रुपैयाँ लागतमा ‘यार्सा मिनरल्स वाटर’ उद्योग स्थापना गरिएको थियो ।
पातारासी गाउँपालिका– ८ उर्थुचौतारामा स्थापना भएको पानी उद्योग प्राविधिक कारणले केही वर्ष बन्द भए पनि पुनः सञ्चालनमा ल्याएको उद्योग सञ्चालक गणेश रोकायाले बताए । उनले पानीको जार मंसिरदेखि बजारमा आए पनि बोतलमा भने फागुन दोस्रो सातादेखि बजारमा आएको बताए ।
हिमाली जडीबुटी मिसावट मूलको पानी उपकरणमार्फत शुद्धीकरण गरी जार र बोतलमा बिक्री–वितरण भएको उनले बताए । पछिल्लो चरणमा २० लाख खर्च गरी उद्योग पुनः सञ्चालनमा ल्याएका छौँ । अहिले तीनजना कर्मचारी उद्योगमा रोजगार छन् । दुईजना कर्मचारी थप गर्नुपर्ने स्थिति देखिएको छ ।
अहिले पानी कार्टुनमा १९० रुपैयाँमा बेचिरहेका छौँ । उपभोक्तासम्म पुग्दा प्रतिजार ७० रुपैयाँसम्म पर्न जान्छ । उद्योगी रोकायाले बाहिरबाट आउने जार बोतलको पानी बोरिङबाट निकाल्छन् भने यहाँ शुद्ध मूलको पानी प्रोसेसिङ फिल्टरिङ (शुद्धीकरण) गर्ने गरिएकाे बताए । जसले गर्दा बाहिरबाट आएको पानीभन्दा यहाँको पानी निकै सफा र शुद्ध हुन्छ ।
यार्सा मिनिरल्स वाटर बजारीकरण गर्दै आएका तोरनसिंह कठायतका अनुसार बाहिरको पानीभन्दा यहाँ उत्पादन भएको पानी सस्तो मूल्यमा बिक्री भइरहेको छ । डिलरलाई १९० रुपूयाँ र अरू व्यापारीलाई दुई सय रुपैयाँमा बिक्री गर्ने गरिएको छ । बाहिरबाट आएको पानी फुटकरमा प्रतिबोतल ३० रुपैयाँ, काटुनमा २३० देखि २५० रुपैयाँसम्म बिक्री भइरहेको छ ।
पहिला यहाँ बिजुली नहुँदा उत्पादन भएको पानी जेनेरेटरबाट चलाउँदा बाहिरको भन्दा महँगो पर्ने जान्थ्यो । तर, अहिले यहाँ करिब एक मेगावाटको बिजुली उत्पादन भएपछि बिजुलीबाटै पानी उद्योग सञ्चालन गर्न थालेपछि सस्तो भएको हो । अब बाहिरको पानी यहाँ खपत नहुने देखिएको बजारीकरण गर्दै आएकाे कठायतले बताए ।
