नेपाली कांग्रेसका महामन्त्री गगन थापाले भ्रष्टाचार काण्डका चर्चा धेरै हुने गरेको बताउँदै यसको दीर्घकालीन समाधान गर्ने गरी उच्चस्तरीय छानबिन आयोग बनाउनुपर्ने प्रस्ताव गरेका छन् । आइतबार रोल्पाको लिवाङमा कांग्रेस जिल्ला सम्मेलनलाई सम्बोधन गर्दै थापाले भ्रष्टाचारलाई पूर्ण रूपमा निर्मूल पार्न अधिकारसहितको आयोग बनाउनुपर्ने प्रस्ताव गरे ।
‘उच्चस्तरीय आयोग बनाऔँ, पूर्वप्रधानन्यायाधीशको संयोजकत्वमा हुन्छ या कसको नेतृत्वमा हुन्छ । त्यो आयोगलाई के–के अधिकार दिने हो दिऔँ र अहिलेसम्म प्रधानमन्त्री भएको, हामीजस्तो मन्त्री भएको, मेयर भएको सबको सम्पत्ति छानबिन गरौँ,’ थापाले भने, ‘सम्पत्ति छानबिन गर्दैगर्दा जसले गलत ढंगले सम्पत्ति कमाएको देखिन्छ, तिनको सम्पत्ति पनि खोसौँ र सरकारको ढुकुटीमा राखौँ । अनि जे सजाय दिनुपर्छ दिऔँ ।’ उनले सजाय दिँदा कांग्रेस, एमाले, माओवादी जसको जो परे पनि निष्पक्ष गर्न दिनुपर्ने बताए ।
उनले कांग्रेस यस मामिलामा प्रस्ट भएको बताउँदै कसैले गलत गरेको छ भने त्यसलाई चोख्याउन पार्टीले कुनै भूमिका नखेल्ने बताए । ‘हामी एउटा कुरामा प्रस्ट होऔँ कि हाम्रो पार्टीले कुनै पनि मान्छेले गलत गरेको छ भने त्यसलाई गलत भन्छ । चाहे आफ्नै पार्टीका साथीले गरेको किन नहोस्,’ उनले भने ।
प्रचण्डको चकचकले यो सरकार बन्यो
कांग्रेस महामन्त्री गगन थापाले प्रचण्डको चकचकका कारण अहिलेको सरकार बनाउनुपर्ने स्थिति सिर्जना भएको बताएका छन् । ‘प्रचण्डको चकचकको कारणले गर्दा कांग्रेस र एमालेको सरकार बन्यो । कांग्रेससँग हुँदा चकचक गर्दै एमालेकोमा जानुभयो, फेरि केपी ओली त बेइमान रहेछन् भन्दै कांग्रेससँग भन्न थाल्नुभयो । प्रचण्डको यही चकचकका कारण कांग्रेस–एमालेको सरकार बनाउनुपर्ने स्थिति आयो,’ थापाले भने ।
कांग्रेस र माओवादीको सरकार भएका वेला एमालेका तर्फबाट पचासपटक प्रस्ताव आएको बताए । ‘माओवादीलाई छोड्नुस्, कांग्रेसलाई चाहिएको भए हामी प्रधानमन्त्री दिन तयार छौँ भनेर पचासपटक प्रस्ताव आयो, प्रधानमन्त्रीले संसदमै बसौँ न भन्नुभयो,’ थापाले भने, ‘तर, शेरबहादुर देउवा जानुभएन, बरु भन्नुभयो कि हामीले माओवादीलाई वचन दिएका छौँ ।’
कांग्रेस–एमालेको सरकार ०८४ को चुनावसम्म निर्वाध जाने दाबी उनको छ । उनले भने, ‘अब ०८४ सालसम्म हाम्रोतर्फबाट कुनै पनि चकचक हुँदैन । कुनै पनि उपद्रो हुँदैन । जुन दिनसम्म एमालेले सरकार चलाउने सहमति भएको छ त्यो दिनसम्म कांग्रेस चुपचाप बस्छ र जुन दिन कांग्रेसले सरकारको नेतृत्व गर्ने सहमति भएको छ, त्यस दिन एमालेले इमानदारीपूर्वक नेतृत्व हस्तान्तरण गर्छ भन्ने अपेक्षा गर्छौँ । यो तीन वर्षमा सरकार बनाउने, ढाल्ने खेलमा लाग्दैनौँ ।’
सरकार सञ्चालन प्रभावकारी हुनुपर्ने भन्दै थापाले कांग्रेसले जितेका कुनै पनि क्षेत्र टाढैबाट हेर्दा अलग्गै चिनिने हुनुपर्ने बताए । उनले कांग्रेसले जितेको ठाउँमा ०८४ सालमा घोषणापत्र होइन, रिपोर्ट कार्ड लिएर जानुपर्ने बताए । ‘हामीले घुस खाएनौँ, सीमित स्रोतसाधनका बाबजुद पनि यो यो गर्याैँ भनेर रिपोर्ट कार्ड लिएर जनतामा जाने हो,’ थापाले भने, ‘कांग्रेसले जितेको ठाउँमा हाम्रो कामले भोट दिने वातावरण बनाउने हो ।’
