भैरहवास्थित गौतम बुद्ध अन्तर्राष्ट्रिय विमानस्थलमा अन्तर्राष्ट्रिय उडानले पुनः गति लिन थालेको छ । बिहीबार मात्रै तीन वायुसेवा कम्पनीले गरेको अन्तर्राष्ट्रिय उडानमार्फत चार सय ५२ यात्रुले आवतजावत गरेका छन् ।
बिहीबार कुवेतको जजिरा, फ्लाई दुबई र थाई एयर एसियाले उडान गरेको गौतम बुद्ध विमानस्थलका महाप्रबन्धक प्रताप तिवारीले जानकारी दिए । जजिरा एयरवेजले एक सय दुईजना यात्रु बोकेर भैरहवा अवतरण गरेको थियो ।
भैरहवाबाट एक सय ४९ यात्रु लिएर जजिराले उडान गर्यो । फ्लाई दुबईको जहाजबाट ४४ जना यात्रु भैरहवा ओर्लिए भने २९ जना उडे । त्यस्तै, थाई एयर एसियाले भैरहवाबाट एक सय २८ यात्रु लिएर उडान गरेको तिवारीले बताए । महाप्रबन्धक तिवारीले सामाजिक सञ्जाल फेसबुकमार्फत भैरहवामा बिहीबार एकै दिन तीन उडान भएको र ती उडानबाट चार सय ५२ यात्रुले आवतजावत गरेको जानकारी गराएका हुन् ।
२ जेठ ०७९ देखि सञ्चालनमा आएको गौतम बुद्ध अन्तर्राष्ट्रिय विमानस्थल गत कात्तिकदेखि नियमित सञ्चालनमा आउन थालेको थियो । यद्यपि, एयरलाइन्स कम्पनीहरूले न्यून भिजिबिलिटीको कारण देखाउँदै उडानलाई स्थगन गरेका थिए । अहिले एकै दिन तीनवटा अन्तर्राष्ट्रिय उडान हुँदा विमानस्थलमा चहलपहल बढेको महाप्रबन्धक तिवारीले बताए ।
‘गौतम बुद्ध विमानस्थलमा माहोल सिर्जना भएको छ, अब आन्तरिक र अन्तर्राष्ट्रिय यात्रुमाझ पनि भैरहवाको प्रचारप्रसार हुनेछ,’ उनले भने, ‘अन्तर्राष्ट्रिय उडानले निरन्तरता पायो भने यात्रुले पनि भैरहवाबाटै उडान गर्न टिकट काट्नेछन्, भैरहवामा यात्रु पाउन थाल्नेछन् ।’
भैरहवा र पोखरामा अन्तर्राष्ट्रिय उडानहरू आकर्षित गर्न ल्यान्डिङ, पार्किङ, नेभिगेसन, ग्राउन्ड ह्यान्डलिङ (५० प्रतिशत छुट), यात्रुसेवा शुल्क, हवाई टिकटमा भ्याट छुट, हवाई इन्धनमा विशेष सहुलियत उपलब्ध गराइएको छ ।
