साबिक विजेता हेल्प नेपाल स्पोर्टस् क्लबले पाँचौँ टाइगर कप राष्ट्रिय तथा अन्तर्राष्ट्रिय आमन्त्रित क्लब पुरुष भलिबल प्रतियोगितामा खराब सुरुवात गरेको छ । पोखरा रंगशालास्थित भलिबल कोर्टमा हेल्प नेपाल आफ्नो पहिलो खेलमा भारतको सुनील भलिबल क्लबसँग ३–१ को सेटमा पराजित भयो । पहिलो सेटमा सहज जित निकालेको हेल्प नेपालले त्यसपछिका सेटमा खराब प्रदर्शन गर्यो ।
पहिलो सेटमा २२–२५ ले पछि परेको सुनील भलिबलले दोस्रोमा २५–२३, तेस्रोमा २७–२५ र चौथोमा २५–१६ अंकसहित खेलमा बाजी मार्यो । खराब प्रकाशका कारण शनिबार स्थगित भएको महिलातर्फको खेलमा आयोजकको टोलीले त्रिभुवन आर्मी क्लबलाई ३–० को सोझो सेटमा हराएको छ । आयोजक टोली २५–१४, २५–११ र २५–२१ ले विजयी भयो । आयोजकको टोली राष्ट्रिय टोलीकी कप्तान अरुणा शाहीको कप्तानीमा थाइल्यान्डका तीन खेलाडीसहित मैदान उत्रेको थियो ।
पुरुषतर्फ घरेलु टोली गण्डकी प्रदेशमाथि नेपाल पुलिस क्लबले ३–२ को सेटमा जित निकाल्यो । पहिलो दुई सेटमा अग्रता लिएको पुलिस त्यसपछिका दुई सेटमा पछि परेको थियो । अन्तिम तथा पाँचौँ सेटमा पुलिसले गण्डकीलाई हरायो । पहिलो २५–२२ र दोस्रो २५–२१ ले आफ्नो पक्षमा पारेको पुलिस तेस्रो सेटमा २५–१९ र चौथो सेटमा २५–१४ ले पछि परेको थियो । निर्णायक अन्तिम सेटमा पुलिस १५–१० ले विजयी भयो । पुरुषतर्फ आर्मी क्लबले नेपाल एपिएफ क्लबलाई २५–१८, २५–२३ र २५–१५ ले हरायो ।
