पहिलो दिनदेखि अग्रता बनाएका नीरज तामाङले शुक्रबार सूर्य नेपाल गल्फ टुर २०२४–२५ अन्तर्गतको सूर्य नेपाल वेस्टर्न ओपनको उपाधि जितेका छन् । जयराम श्रेष्ठलाई तीन स्ट्रोकले हराउँदै उनले समग्रमा १–अन्डर २०६ स्कोर गर्न सफल भए । उनले अन्तिम दिन ४ ओभर ७३ स्कोर गर्दै उपाधि हात पारे । नीरजले एक लाख ५० हजार प्राप्त गरेका छन् ।
नीरजले पोखरामा उपाधि जितेको यो पहिलोपटक हो । उनको करिअरको तेस्रो उपाधि हो । उनले गत सिजनमा सूर्य नेपाल काठमाडौं ओपन र यस सिजनमा सूर्य नेपाल वेस्टर्न ओपन जितेका थिए । इभन पार ६९ को कार्डका साथ जयराम दोस्रो भए । जयरामले समग्रमा २ ओभर २०९ स्कोर गरेका छन् । उनले एक लाख रुपैयाँ पाएका छन् । समग्रमा ३ ओभर २१० को स्कोरका साथ भुवनकुमार रोक्काले तेस्रो हुँदै ७५ हजार रुपैयाँ हात पारे ।
भुवनले अन्तिम दिन ७ ओभर ७६ स्कोर गरेका थिए । नेपालका नम्बर एक प्रोफेसनल भुवन नगरकोटी चौथो स्थानमा सीमित भएका छन् । उनले समग्रमा ४ ओभर २११ स्कोर गरे । समग्रमा ७ ओभर २१४ स्कोरका साथ सञ्जय लामा, धन थापा, विष्णुप्रसाद शर्मा र रामे मगरले पाँचौँ स्थान बाँडेका छन् । विष्णु र रामेले ४ ओभर ७२ स्कोर गरेका थिए । सञ्जय र धनले ७ ओभर ७६ स्कोर गरे । उनीहरूले जनही ४४ हजार रुपैयाँ पाएका छन् ।
एमेच्योरमा सुरेश तामाङ पहिलो भएका छन् । इभन पार ६९ को स्कोर गरेका सुरेशले समग्रमा ९ ओभर २१६ को नतिजा निकाले । उनले शीर्ष स्थानमा सुमन परियारलाई दुई स्ट्रोकले हराए ।
