२१ वर्षीय ब्याटर नीतीशकुमार रेड्डीको शतकप्रेरित भारतले अस्ट्रेलियाविरुद्धको बोर्डर–गवास्कर ट्रफी टेस्टमा राहत पाएको छ । आन्ध्र प्रदेशका दायाँहाते ब्याटरले आठौँ नम्बरमा क्रिजमा पुग्दै भारतलाई ठुलो हारबाट तत्काललाई जोगाएका छन् । उनले तेस्रो दिनको खेल सम्पन्न हुँदा १०५ रन बनाएका छन् । १७६ बलमा १० चौका र १ छक्का प्रहार गरेका छन् । नितिश आठौँ नम्बरमा शतक बनाउने पहिलो भारतीय खेलाडीसमेत बने । योेसँगै उनलाई आन्ध्रप्रदेश क्रिकेट एसोसिएसनले २५ लाख पुरस्कार दिने घोषणा गरेको छ । उनी शतक बनाउने तेस्रो कान्छा खेलाडी पनि हुन् ।
नीतीशलाई दशौँ नम्बर क्रिजमा पुगेका मोहम्मद सिराजले दुई रन बनाएर साथ दिएका छन् । दोस्रो दिनको खेल सम्पन्न हुँदा भारतले ९ विकेट गुमाउँदै ३५८ रन बनाएका छन् । भारत अझै घरेलु टोलीसँग ११६ रनले पछि छ । यसअघि अस्ट्रेलियाले स्टेभ स्मिथको शतक मद्दतमा ४७४ रन बनाएको थियो । दुई टोलीबिच हुने पाँच सिरिज हाल १–१ को बराबरीमा छ । पहिलो टेस्ट भारतले २ सय ९५ रनले जितेको थियो । अस्ट्रेलियाले दोस्रो टेस्ट १० विकेटले जितेको थियो । तेस्रो टेस्ट बराबरीमा सकिएको छ ।
नीतीश र वासिङटनले जोगाए फलोअन
दोस्रो दिनको खेल सम्पन्न हुँदा पाँच विकेट गुमाएर भारतले जम्मा १६४ रन बनाएको थियो । यससँगै भारतलाई फलोअनको दबाब थियो । तर, नितिश र वासिङटन सुन्दरले तेस्रो दिन १२७ रनको साझेदारी गरेपछि भारत फलोअनबाट जोगिएको हो । भारतका लागि दोस्रो दिन यशस्वी जैसवालले ८२ बनाएका थिए । मध्यक्रमका खेलाडी चल्न नसक्दा नितिश र वासिङटनले भारतको इनिङ जोगाएका हुन् । वासिङटन ५० रन बनाएर आउट भएका छन् । कप्तान रोहित शर्मा ३, केएल राहुल २४, विराट कोहली ३६, आकाश दीप डक, ऋषभ पन्त २८, रवीन्द्र जडेजा १७ रन बनाएर आउट भएपछि भारत दबाबमा आएको हो ।
