अमेरिकाका नवनिर्वाचित राष्ट्रपति डोनाल्ड ट्रम्पले अमेरिकामा जन्मिएका, तर आवश्यक कागजात नभएका व्यक्तिलाई स्वतः नागरिकता दिने नीति अन्त्य गर्ने बताएका छन् ।
अमेरिकी संविधानको १४औँ संशोधनअनुसार अमेरिकामा जन्मिएका बच्चालाई अमेरिकी नागरिकता दिने व्यवस्था छ । यस्ता बच्चाको आमा–बाबुसँग अमेरिकाको नागरिकता नभए पनि अमेरिकामा जन्मनासाथ तिनले स्वतः अमेरिकी नागरिकता पाउँदै आएका थिए ।
यद्यपि, उनले बाल्यकालमा अमेरिका आएका अवैध आप्रवासीहरूलाई मद्दत गर्न डेमोक्य्राट्ससँग सहकार्य गर्ने प्रस्ताव गरेका छन् । बाल्यकालमा अमेरिका प्रवेश गरेका, तर अहिलेसम्म कुनै कागजात नबनाएकाहरूको अधिकार रक्षाका लागि काम गर्ने संकेत उनले गरेका हुन् ।
ट्रम्पले एनबिसीलाई दिएको अन्तर्वार्तामा अवैध आप्रवासीहरूलाई देशबाट निकाल्नका लागि काम गर्ने कुरा दोहोर्याएका छन् । उनले नाटोबाट बाहिर निक्लनेबारे गम्भीरतापूर्वक विचार गर्ने बताएका छन् ।
उनले आफ्नो कार्यकालको पहिलो दिन नै सन् २०२१ को युएस क्यापिटल हिल दंगामा संलग्न व्यक्तिहरूलाई माफी दिने बताएका छन् । शुक्रबार ट्रम्पले आफ्नो कार्यकालमा आप्रवासन, ऊर्जा र अर्थतन्त्रमा सुधारका लागि केही आदेश जारी गर्ने घोषणा गरेका छन् ।
