हवाई उडानमा भएको सुधारले यो वर्ष २६ अर्ब ३५ करोड उठाउने लक्ष्य, चार महिनामै लक्ष्यको ३७.१३ प्रतिशत संकलन
हवाई उडानको चाप बढ्दा उड्डयन क्षेत्रबाट सरकारले पाउने राजस्वमा वृद्धि भएको छ । चालू आर्थिक वर्ष ०८१/८२ को पहिलो चार महिना (साउन–कात्तिक)मा वायुसेवा, सञ्चार र बिमा क्षेत्रबाट नौ अर्ब ७९ करोड रुपैयाँ मूल्य अभिवृद्धि कर (भ्याट) दाखिला भएको आन्तरिक राजस्व विभागले जनाएको छ ।
साउनदेखि कात्तिकसम्म संकलित कुल भ्याट रकममा उड्डयन क्षेत्रको योगदानको वृद्धिदर सबैभन्दा बढी भएको विभागले जनाएको छ । वायुसेवा कम्पनीले हवाई टिकट बिक्री गरेबापत भ्याट बुझाएका हुन् । पछिल्लो समय राष्ट्रिय तथा अन्तर्राष्ट्रिय उडानतर्फ यात्रुको संख्या बढेकाले भ्याटमा यस क्षेत्रको योगदानमा पनि वृद्धि भएको हो ।
गत आव ०८०/८१ को पहिलो चार महिनामा हवाई, सञ्चार र बिमा क्षेत्रबाट चार अर्ब ८६ करोड ९२ लाख रुपैयाँ भ्याट संकलन भएको थियो । यो कुल भ्याट संकलनमा १४.२० प्रतिशत मात्रै हिस्सा थियो ।
गत आवमा यस क्षेत्रबाट २३ अर्ब ५४ करोड रुपैयाँ संकलन भएको विभागले जनाकारी दिएको छ । यो वर्ष २६ अर्ब ३५ करोड ४५ लाख रुपैयाँ भ्याट उठाउने लक्ष्य लिइएको छ । लक्ष्यको ३७.१३ प्रतिशत भ्याट चार महिनामै उठिसकेको छ ।
चिनियाँ एयरलाइन्सको करिब चार अर्ब बक्यौता
अन्तर्राष्ट्रिय उडान गर्ने चिनियाँ एयरलाइन्सले भने भ्याट नतिरेको आन्तरिक राजस्व विभागले जनाएको छ । सरकारले हवाई क्षेत्रमा भ्याट लागू गरेपछि चिनियाँ दूतावासबाट नै यो व्यवस्था लागू नगर्न दबाब आएको अर्थ मन्त्रालयका अधिकारीहरू बताउँछन् । विभाग स्रोतअनुसार हाल चिनियाँ एयरलाइन्सहरूले करिब चार अर्ब रुपैयाँ तिर्न बाँकी देखिन्छ । ‘सुरुवाती चरणमा अरू विमान कम्पनीहरूले पनि भ्याट लागू नगर्न सामूहिक पहल गरेका थिए । तर, ठुला वायुसेवा कम्पनीहरूले धमाधम तिर्न थालेपछि अरू कम्पनीहरूले पनि क्रमशः तिर्न थालेका हुन्,’ अर्थका एक अधिकारीले भने ।
हवाई क्षेत्रको बढ्दो चहलपहल
नेपालको विमानस्थल हुँदै बिदेसिँदा र आन्तरिक उडानका हवाई टिकटमा भ्याट तिर्नुपर्ने व्यवस्था छ । अध्यागमन विभागअनुसार सन् २०२४ को अगस्टसम्ममा नेपालबाट वैधानिक मार्ग हुँदै दुई लाख ११ हजार नौ सय २१ जनाले विदेश प्रस्थान गरेका छन् । यस्तै, ०२४ को अक्टोबरसम्ममा १४ हजार ३८ पटक विमान विदेशतर्फ प्रस्थान गरेको त्रिभुवन विमानस्थलको तथ्यांकले देखाएको छ । जसमा २१ लाख ६६ हजार पाँच सय ८९ जना यात्रुले उडान गरेका छन् ।
