प्राकृतिक प्रकोपका कारण यस वर्ष विश्वभर अनुमानित तीन खर्ब १० अर्ब अमेरिकी डलरबराबरको आर्थिक क्षति भएको पुनर्बिमा कम्पनी स्विस रेले जनाएको छ। जलवायु संकटका कारण सन् २०२३ को तुलनामा ६ प्रतिशतले वृद्धि भएको स्विस रेको भनाइ छ।
यसैबिच, हेलेन र मिल्टन नामक विनाशकारी आँधीबेहरीका कारण बिमा गरिएको क्षति १७ प्रतिशतले वृद्धि भई १३५ अर्ब अमेरिकी डलर पुगेको स्विस रेद्वारा जारी विज्ञप्तिमा उल्लेख छ। बिमा घाटा एक सय अर्ब डलरभन्दा माथि पुगेको यो लगातार पाँचौँ वर्ष भएको कम्पनीले जनाएको छ।
स्विस रेका विपत्ति र खतराका प्रमुख बाल्ज ग्रोलिमुन्डले विज्ञप्तिमा भनेका छन्, ‘यो बढ्दो क्षतिको बोझको अधिकांश परिणाम सहरी क्षेत्रमा मूल्य एकाग्रता, आर्थिक वृद्धि र बढ्दो पुनर्निर्माण लागतको परिणाम हो।’ स्विस रेले बिमा कम्पनीहरूको बिमाकर्ताको रूपमा काम गर्छ र जलवायु परिवर्तनको प्रभावमा महत्व दिन्छ। ग्रोलिमुन्डले भने, ‘यस वर्षको धेरै विपत्तिको कारण बनेको परिस्थितिलाई समर्थन गरेर, जलवायु परिवर्तनले पनि बढ्दो भूमिका खेलिरहेको छ।’ कम्पनीले विशेष गरी बाढीको बढ्दो बिमा लागतलाई महत्व दिएको छ।
युरोप र संयुक्त अरब इमिरेट्समा मात्र तीव्र बाढीका कारण बिमाकर्ताहरूले १३ अर्ब अमेरिकी डलर खर्च गरेका छन्। सन् २०२४ बाढीका लागि विश्वमा तेस्रो र युरोपका लागि दोस्रो सबैभन्दा महँगो वर्ष हो। संयुक्त राज्य अमेरिकाले यसबिचमा सबैभन्दा बढी बिमा गरिएको नोक्सानी व्यहोरेको छ।
सेप्टेम्बरको अन्त्य र अक्टोबरको सुरुमा दक्षिणपूर्वी संयुक्त राज्य अमेरिकामा आएको ‘हेलेन’ र ‘मिल्टन’ नामक आँधीका कारण मात्रै ५० अर्ब अमेरिकी डलर बराबरको क्षति भएको स्विस रेले जनाएको छ । तीव्र आँधीबेहरीको उच्च श्रृङ्खलाको मतलब संयुक्त राज्य अमेरिकाले सन् २०२४ को कुल विश्वव्यापी बिमा हानीको कम्तिमा दुई–तिहाइको लागी जिम्मेवार रहेको स्वीस बिमा कम्पनीले जनाएको छ ।
