पाकिस्तानी तीव्र गतिका बलर सोहिल तनविर चम्किएपछि काठमाडौं गुर्खाजलाई पाँच विकेटले हराउँदै चितवन राइनाेजले नेपाल प्रिमियर लिग एनपिएलमा विजयी सुरुवात गरेको छ ।
सोमबार कीर्तिपुर मैदानमा टस हारेर ब्याटिङ गरेको काठमाडौंले पूरा ओभर खेल्दै नाै विकेट गुमाएर ११२ रनको लक्ष्य प्रस्तुत गर्याे । प्रत्युत्तरमा चितवनले १७.१ ओभरमा पाँच विकेट गुमाउँदै विजयी सुरुवात गरेको हो । चितवनको जितमा पाकिस्तानका चर्चित खेलाडी तनविरले चार ओभरमा पाँच विकेट लिएका थिए ।
चितवनका लागि लक वेनकेनस्टाइनले १७ बलमा एक चौका र दुई छक्कासहित सर्वाधिक २२ रन बनाए । उनलाई गेहार्ड इरास्मसलले एलबिडब्लू धरापमा पारेका थिए । अनुभवी खेलाडी शरद भेषवाकरले २१ बलमा अविजित ११ रन बनाएका थिए । सन्तोष कार्कीेले पनि एक चौका र एक छक्कासहित अविजित ३१ बलमा २८ रन बनाएका हुन् ।
कप्तान कुशल मल्ल र इंग्ल्यान्डका अनुभवी खेलाडी रवि बोपराले समान ११ रन बनाएका हुन् । यसअघि ओपनर हसन इसाखिलले १२ रनको योगदान गरे । यसबाहेक ओपनर दीपक बोहराले एक रन जोडे ।
काठमाडौंका सहाब आलमले सर्वाधिक तीन विकेट हात पारे । नामिबियाका कप्तानसमेत रहेका इरास्मस र इंग्ल्यान्डका डानले समान एक विकेट हात पारेका थिए ।
यसअघि टस हारेर ब्याटिङ गरेको काठमाडौंले पावरप्लेबाटै कमजोर प्रदर्शन गर्याे । पाकिस्तानका तनविरले तीन ओभरमा तीनै विकेट लिएपछि दबाबमा आएको काठमाडौंले पावरप्लेमा चार विकेट गुमाउँदा मात्र ३९ रन बनायो । ओपनर स्टेफन इस्किनाजी दुई तथा माइकल लेभिट २५ रन बनाएर आउट भएका थिए । गेहार्ड इरास्मस चार र भीम सार्कीले एक रन बनाएका हुन् । टोलीले ५.२ ओभरमा चार विकेट गुमाउँदा मात्र ३४ रन जोडेको थियो ।
यसबाहेक काठमाडौंका लागि सुमित महर्जनले सर्वाधिक २९, लेभिटले २५, डन डाउथवेटले अविजित १९ र शंकर रानाले १६ रन लिए । रसिद खान चार, कप्तान करण केसीले एक र दीपेश कँडेलले अविजित एक रन मात्रै बनाएका थिए ।
सन् २००८ मा राजस्थानलाई आइपिएल र सन् २००९ मा पाकिस्तानलाई आइसिसी टी–२० विश्वकप उपाधि जिताउँदाका मुख्य खेलाडी तनविर एक्लैले सर्वाधिक पाँच विकेट लिए । चार ओभर बलिङ गरेका उनले २१ रन खर्चिएका हुन् । उनले काठमाडौंका इस्किनाजी, कप्तान करण केसी, शंकर राना र माइकल लेविटलाई आउट गरेका थिए । रिजन ढकाल, कप्तान कुशल मल्ल, अमर रौटेला र लुक बेन्केस्टेइनले समान एक विकेट हात पारे ।
यसअघि प्रतियोगिताको उद्घाटन खेलमा जनकपुर बोल्ट्सले विराटनगर किंग्सलाई आठ विकेटले हराएको थियो । आज हुने दोस्रो खेलमा जनकपुरले कर्णाली याक्सको सामना गर्दै छ । यो खेलमा चर्चित खेलाडी भारतीय शिखर धवनले कर्णाली याक्स र न्युजिल्यान्डका जिमी निसमले जनकपुरको प्रतिनिधित्व गर्नेछन् ।
