सहकारीको रकम हिनामिना आरोपमा अनुसन्धानका लागि रुपन्देही ल्याइएका राष्ट्रिय स्वतन्त्र पार्टीका सभापति रवि लामिछानेसँग दुई दिनमा साढे १२ घण्टा बयान लिइएको छ । सरकारी वकिलको कार्यालय रुपन्देहीमा मंगलबार तीन घण्टा ३५ मिनेट र बुधबार लगातार नौ घण्टा गरी साढे १२ घण्टा बयान लिइएको हो । बयान लिने काम अझै नसकिएको प्रहरीले जनाएको छ ।
जिल्ला सरकारी वकिलको कार्यालय रुपन्देहीका जिल्ला न्यायाधिवक्ता प्रेमराज पौडेलले बुधबार बिहान सवा १० देखि साँझ ७:१० सम्म बयान लिइएको जानकारी दिए । बुटवलस्थित सहकारीको रकम हिनामिना आरोपमा अनुसन्धानका लागि रुपन्देही ल्याइएको हो । जिल्ला न्यायाधिवक्ता पौडेलले बयान अन्तिम अवस्थामा पुगे पनि अझै नसकिएको बताए । बिहीबार नम्बरिङ र रुजुको कामपछि आवश्यकताअनुसार बयान हुने उनको भनाइ छ । लामिछानेसँग बयान लिन नौजनाको टिम खटिएको थियो । जसमा पाँचजना अनुसन्धान अधिकृतसहित सरकारी वकिलको टिम थियो । सुप्रिम सहकारीमा भएको अपचलनको अनुसन्धान गर्ने क्रममा लामिछानेले बयानमा आफ्नो संलग्नता अस्वीकार गर्दै आएको स्रोतले जनाएको छ । बयानपछि लामिछानेलाई जिल्ला प्रहरी कार्यालय रुपन्देही लगिएको प्रहरी उपरीक्षक रञ्जितसिंह राठौरले बताए ।
गत २ कात्तिकमा काठमाडौंको वनस्थलीबाट पक्राउ परेका लामिछानेलाई कास्की लगिएको थियो । कास्की प्रहरीको हिरासतमा रहेका उनलाई बयानका लागि मंगलबार भैरहवा ल्याइएको थियो । सहकारीको रकम हिनामिना आरोपमा अनुसन्धानका लागि प्रहरी हिरासतमा रहेका उनलाई आइतबार कास्की जिल्ला अदालतले अनुसन्धान गर्न थप १३ दिन हिरासत राख्न अनुमति दिएको थियो । सूर्यदर्शन सहकारीको रकम अपचलनमा पोखरामा अनुसन्धान गरिरहेको प्रहरीले रुपन्देहीको सुप्रिम सहकारीमा भएको अपचलनको अनुसन्धान गर्न रुपन्देही ल्याएको हो । संगठित अपराध र सम्पत्ति शुद्धीकरणमा समेत प्रहरीले उनीमाथि अनुसन्धान गरिरहेको छ ।
रास्वपाको प्रदर्शन निरन्तर
पार्टी सभापति रवि लामिछाने पक्राउको विरोधमा रास्वपाले भैरहवामा बुधबार पनि प्रदर्शन गरेको छ । भैरहवा लुम्बिनी रोडमा लामिछानेको पक्षमा प्रदर्शनपछि कोणसभा गरिएको थियो । कोणसभामा रास्वपाका उपसभापति डिपी अर्यालसहितका नेताहरूले सम्बोधन गरेका थिए । रास्वपा नेताहरूले सरकारले गलत नियतले लामिछानेलाई दुःख दिइरहेको बताए । उनीहरूले राजनीतिक षड्यन्त्र चिरेर अगाडि बढ्नुपर्ने अवस्था आएको समेत बताए ।
