सल्यानमा मिनीट्रक दुर्घटनामा परी मृत्यु हुनेको संख्या चार पुगेको छ। मृत्यु हुनेमा ट्रकचालक २४ वर्षीय मानबहादुर भण्डारी रहेको जिल्ला प्रहरी कार्यालय सल्यानले जनाएको छ।चालक भण्डारीको राप्ती प्रादेशिक अस्पताल तुलसीपुरमा सोमबार राति मृत्यु भएको जिल्ला प्रहरी कार्यालय सल्यानका सूचना अधिकारी प्रहरी निरीक्षक रेशमबहादुर खत्रीले जानकारी दिए ।
सोमबार नै १४ वर्षका गोवर्द्धन खड्का, १२ वर्षीय डिल्ली भन्ने अनिल भण्डारी, १३ वर्षीया सिर्जना बस्नेतको मृत्यु भएको थियो। दुईजनाको घटनास्थलमै र एकजनाको बाटोमा मृत्यु भएको थियो । यस्तै दुर्घटना परी अन्य आठजना घाइते भएका थिए । घाइते हुनेमा १३ वर्षीया खुमा बस्नेत, ३५ वर्षीया नन्दा बस्नेत र ३५ वर्षीय देवबहादुर बस्नेतको नर्सिङ होम नेपालगन्जमा उपचार भइरहेको छ भने १७ वर्षीय जितसागर बस्नेतको राप्ती प्रादेशिक अस्पताल तुलसीपुरमा उपचार भइरहेको खत्रीले बताए ।
अन्य सहचालक १८ वर्षीय रोनक भण्डारी, २२ वर्षीय हिक्मत पुन, २९ वर्षीय शंकर खड्का र १७ वर्षीय सञ्जीव बस्नेत उपचारपश्चात् डिस्चार्ज भइसकेको उनले बताए। सल्यानको कपुरकोट गाउँपालिका– ६ सिनबाङको दुबेदेबाट धान र पराल लिएर सिनबाङ जाँदै गरेको रा.१२ख २४०२ नम्बरको मिनीट्रक सोमबार बेलुकी करिब ६ बजेतिर दुर्घटनामा परेको थियो। बाटोमा रहेको रुखलाई बचाउन लाग्दा गाडी सडकबाट १५० मिटर तल खसेको थियो ।
