थाइल्यान्डको सत्तारुढ फेउ थाई पार्टीले पूर्वप्रधानमन्त्री थाक्सिन सिनावात्राकी ३७ वर्षीया छोरी पेटोङटार्न सिनावात्रालाई प्रधानमन्त्रीको उम्मेदवारका रूपमा छनोट गरेको छ । थाइल्यान्डको संवैधानिक अदालतले निवर्तमान प्रधानमन्त्री श्रेथा थाभिसिनलाई पदीय दायित्वको उल्लंघन गरेको आरोपमा बर्खास्त गरेको एक दिनपछि बिहीबार पार्टीले यो घोषणा गरेको हो । श्रेथा एक वर्षभन्दा कम समयमा नै अदालतको आदेशमा पदमुक्त भएका छन् ।
‘हामीले पेटोङटार्न सिनावात्रालाई प्रधानमन्त्री मनोनीत गर्ने निर्णय गरेका छौँ,’ पार्टीका महासचिव सोरावोङ थिएन्थोङले बैंककमा आयोजित पत्रकार सम्मेलनमा भने । पेटोङटार्नलाई प्रधानमन्त्रीका रूपमा अनुमोदन गर्ने कि नगर्नेमा सांसदहरूले शुक्रबार संसद्मा मतदान गर्नेछन् । थाई राजनीतिले दुई दशक लामो अस्थिरताको सामना गरेको छ । अस्थिरतालाई विद्रोह, सडक प्रदर्शन र अदालतको आदेशले चिह्नित गरेको छ । यो अवधिको अधिकांश समय थाक्सिनसँग सम्बन्धित प्रगतिशील पार्टीविरुद्ध सेना र राजावादी समर्थक संस्थापनद्वारा लामो समयदेखि चलिरहेको संघर्षले बढावा पाएको छ ।
गठबन्धनको पनि समर्थन
प्रतिनिधिसभाको शुक्रबारको बैठकले फेउ थाई पार्टीकी नेता पेटोङटार्न सिनावात्रालाई देशको भावी प्रधानमन्त्री चयन गर्न सत्तारुढ गठबन्धनमा रहेका सबै दल एकजुट भएका छन् । यदि उनको मनोनयन स्वीकृत भएमा ३७ वर्षीया पेटोङटार्न थाइल्यान्डको इतिहासकी सबैभन्दा कान्छी प्रधानमन्त्री बन्नेछिन् ।
पेटोङटार्न प्रधानमन्त्री चुनिइन् भने उनी पिता थाक्सिन र उनकी फुपू यिङलकपछि प्रधानमन्त्री बन्ने सिनावात्रा परिवारकी तेस्री र फेउ थाई पार्टीकी चौथो सदस्य हुनेछिन् । थाक्सिनका जेठान सोमचाई वोङसावतले पनि सन् २००८ मा छोटो समयका लागि प्रधानमन्त्रीको भूमिका निभाएका थिए ।
फेउ थाई पार्टीकी प्रधानमन्त्री उम्मेदवारको रूपमा पेटोङटार्नको चयन धेरैका लागि आकस्मिक खबरका रूपमा आएको थियो । यसअघि बुधबार साँझ थाक्सिनको निवासमा बसेको गठबन्धनका प्रमुख नेताहरूको बैठकले पूर्वन्यायमन्त्री तथा महान्यायाधिवक्ता ७५ वर्षीय चाइकासेम नितिसिरीलाई छनोट गर्ने निर्णय गरेको थियो । तर, बिहीबार बिहान गठबन्धन पार्टीहरू र धेरै फेउ थाई सांसदहरूबाट चाइकासेमको मनोनयनको विरोध भएको समाचार आउन थाल्यो ।
फेउ थाईको रणनीति प्रमुख हुँदा उनले ‘लेस म्याजेस्टे’ कानुनलाई संशोधन गर्न समर्थन जनाएको विषयले पछि समस्या पर्न सक्ने बहस सुरु भयो । संसद्को सबैभन्दा ठूलो दल मुभ फर्वार्ड पार्टीले यही कानुनको विरोध गरेको आरोपमा खारेजी भोगेको छ । सो पार्टीले फौजदारी संहिताको दफा ११२ लाई संशोधन गर्नुपर्ने माग राखेको थियो । उक्त माग संवैधानिक राजतन्त्रविरुद्ध भएको भन्दै संवैधानिक अदालतले पार्टी नै विघटन गरिदियो । विरोधबीच बिहीबार दिउँसो फेउ थाई कार्यकारी बोर्डले पेटोङटार्नलाई पार्टीको उम्मेदवारको रूपमा चयन गर्यो ।
मनोनयपछि पत्रकार सम्मेलन गर्दै उनले यस अवसरका लागि फेउ थाई पार्टी र गठबन्धन पार्टीलाई धन्यवाद दिँदै राष्ट्रलाई आर्थिक संकटबाट बाहिर ल्याउन सक्दो प्रयास गर्ने प्रतिक्रिया दिइन् । साथै उनले निवर्तमान प्रधानमन्त्री श्रेथालाई कठोर परिश्रमका बाबजुद सत्ताबाट हटाइएकोमा दुःख व्यक्त गरिन् ।
पत्रकार सम्मेलनमा पेटोङटार्नप्रति समर्थन जनाउन भुमजाइथाई, पलाङ प्रचारथ, चारथाइपट्टना, प्रचात, चार्ट पट्टाना क्ला, सेरिरुआम्थाई र थाई रुम्फालाङ पार्टीका नेता पनि उपस्थिति भएका थिए । ४९३ सिटको संसद्मा गठबन्धनसँग कुल ३१४ सांसद छन् ।
